नौबिसे–मलेखु सडक बुधबारदेखि १५ दिन दैनिक ५ घण्टा बन्द हुने

काठमाडौं । पृथ्वी राजमार्गअन्तर्गत नौबिसे–मलेखु सडकखण्ड १५ दिन दैनिक ५ घण्टा बन्द हुने भएको छ ।

नागढुंगा–मुग्लिङ सडक योजना (पूर्वी खण्ड) कार्यालयका अनुसार उक्त सडकखण्ड असार २६ गते (बुधबार) देखि साउन ९ गतेसम्म दैनिक राति १० बजेदेखि बिहान ३ बजेसम्म बन्द गरिने भएको हो । उक्त सडकखण्डमा पर्ने गणेश खोला, डाङडुङ खोला, खेस्टे खोला र पोखरे खोला पुलहरूको गर्डर लञ्चिङ गरिने भएकाले सडक बन्द गर्न लागिएको हो ।

सडक प्रयोगकर्ताहरूलाई हुन सक्ने जोखिम तथा यातायात आवागमनमा पर्ने बाधालाई मध्यनजर गर्दै सडकखण्डअन्तर्गतका ती स्थानमा सवारी आवागमन बन्द गरिने भएको हो । उक्त अवधिमा एम्बुलेन्स र सुरक्षा निकायले प्रयोग गर्ने सवारीसाधनबाहेक अन्य सवारी साधन आवागमन पूर्ण रूपमा रोकिने कार्यालयले सूचनामार्फत जानकारी गराएको छ ।

साथै वैकल्पिक मार्गका रूपमा गल्छी–विदूर–छहरे–टोखा सडक प्रयोग गर्न सकिने जनाइएको छ ।