ओलीको सचिवालय भन्छः मन्त्रीहरुलाई बालकोट बोलाएको कुरा सत्य होइन

काठमाडौं । नेकपा एमालेका अध्यक्ष केपी ओलीले आफ्नो मन्त्रीहरुलाई बालकोट बोलाएको कुरा सत्या नभएको ओलीको सचिवालयले जनाएको छ ।

यसअघि अध्यक्ष ओलीले एमालेका मन्त्रीहरुलाई छलफलका लागि बालकोट बोलाएको बताइएको थियो । उक्त कुराको खण्डन गर्दै ओलीको सचिवालयले त्यसमा कुनै सत्यता नभएको बताएको हो । ओलीको सचिवालयले भनेको छ,नेकपा एमालेका अध्यक्ष केपी शर्मा ओलीले सरकारमा सहभागी मन्त्रीहरुलाई अहिले साँझ छलफलमा बोलाएको भन्ने विभिन्न सञ्चार माध्यममा खबर आइरहेको छ। तर मन्त्रीहरुलाई अध्यक्ष ओलीले अहिले छलफलका लागि बोलाउनु भएको खबर सत्य नभएको जानकारी गराइन्छ ।

शनिबार कांग्रेस सभापति शेरबहादुर देउवाले एमाले अध्यक्ष केपी शर्मा ओलीसँग भेट गरेपछि तरंगित भएको राजनीतिक वृतमा कांग्रेस–एमालेको सरकार बन्ने चर्चा चलिरहेको छ ।