एजेन्सी । जारी युरोकप २०२४ अन्तर्गत गएराति भएको खेलमा स्लोभाकियालाई २–१ गोलले पराजित गर्दै इंग्ल्याण्ड क्वाटरफाइनलमा प्रवेश गरेको छ ।
ज्युड बेलिंघमले इन्ज्युरी समयमा गोल गर्दै इंग्ल्याण्डलाई हारबाट जोगाएका थिए। ९० मिनेटपछि ६ मिनेट थपिएको अतिरिक्त समयको पाँचौं मिनेटमा बेलिंघमले गोल गरेपछि खेल १–१ को बराबरीमा पुगेको थियो। त्यसअघि २५ औं मिनेटमा स्लोभाकियाका इभान स्क्रन्जले गोल गर्दा इंग्ल्याण्ड १–० गोलले पछाडि परेको थियो।
बेलिंघमले गोल गरेपछि खेल अतिरिक्त समयमा धकेलिएको थियो। अतिरिक्त समयको पहिलो मिनेटमै ह्यारी केनले हेडमार्फत उत्कृष्ट गोल गरेपछि इंग्ल्याण्ड २–१ गोलले अघि बढेको थियो।
उनको त्यो गोल निर्णायक बन्दा इंग्ल्याण्डले क्वाटरफाइनलमा स्थान सुरक्षित गरेको हो। पराजय भएको स्लोभाकिया प्रतियोगिताबाट बाहिरिएको छ।
प्रतिक्रिया