श्रीलंकासँग नेदरल्यान्ड्स ८३ रनले पराजित, सकियो विश्वकपको यात्रा

एजेन्सी । जारी टी–२० विश्वकप २०२४ अन्तर्गत समूह चरणको अन्तिम खेलमा श्रीलंकाले नेदरल्यान्ड्समाथि फराकिलो जीत निकालेको छ ।

आज बिहान भएको खेलमा श्रीलंकाले नेदरल्याण्ड्सलाई ८३ रनको फराकिलो अन्तरले पराजित गर्दै सुखद् अन्त्य गरेको हो । २ सय २ रनको विशाल लक्ष्य पछ्याएको नेदरल्याण्ड्स १६ दशमलव ४ ओभरमा अल आउट हुँदै जम्मा १ सय १८ रन मात्रै बनाउने सकेको थियो । नेदरल्याण्ड्सका ओपनर माइकल लेभिट र कप्तान स्कट एडवार्ड्सले समान ३१/३१ रन बनाउन बाहेक अरु ब्याटरले ठूलो स्कोर बनाउन सकेनन् ।

श्रीलंकाका नुवान तुषाराले ३, वानिन्दु हसरंगा र मथीशा पाथिरानाले २/२ र महेश थीक्षण र दासुन शानकाले एक/एक विकेट लिए । यसअघि टस हारेर पहिले ब्याटिङ गरेको श्रीलंकाले ६ विकेटको क्षतिमा २ सय १ रन बनाएको थियो ।