अमेरिकालाई ७ विकेटले हराउँदै भारत सुपर–८ मा

एजेन्सी । जारी आईसीसी टी–२० विश्वकप २०२४ मा घरेलु आयोजक टोली अमेरिकालाई ७ विकेटले हराउँदै भारतले सुपर–८ मा आफ्नो स्थान सुरक्षित बनाएको छ ।

लगातार तेस्रो जितले भारत समूह ए बाट एक खेल अगावै सुपर ८ मा पुगेको हो । १ सय ११ रनको लक्ष्य पछ्याएको भारतले १८ दशमलव २ ओभरमा ३ विकेट गुमाउँदै पूरा गर्यो । सूर्यकुमार यादव ४९ बलमा २ चौका र २ छक्कासहित ५० तथा शिबम दुबे ३५ बलमा १ चौका र १ छक्कासहित ३१ रनमा नट आउट रहे ।

चौथो विकेटलाई दुबे र सूर्यले ६५ बलमा ६७ रनको साझेदारी गरेका थिए । ओपनर विराट कोहली शून्य र कप्तान रोहित शर्मा ३ रनमा आउट भए । ऋषभ पन्त २० बलमा १ चौका र १ छक्कासहित १८ रनमा अली खानको बलमा बोल्ड आउट भए । अमेरिकाका सौरभ नेत्रवालकरले २ र अली खानले १ विकेट लिए ।

त्यसअघि टस हारेर पहिला ब्याटिङको निम्तो पाएको अमेरिकाले २० ओभरमा ८ विकेट गुमाउँदै १ सय १० रन बनाएको थियो ।