काठमाडौं । वेष्टइन्डिज र अमेरिकामा जारी आईसीसी टी–२० विश्वकप क्रिकेट अन्तर्गत आज राति पाकिस्तान र क्यानडाबिच भिडन्त हुँदैछ ।
खेल नेपाल समय अनुसार राति ८ बजेर १५ मिनेटमा अमेरिकाको न्युयोर्कस्थित नासाउ काउन्टी अन्तर्राष्ट्रिय क्रिकेट स्टेडियममा हुनेछ । पाकिस्तान र क्यानडा समूह ए मा रहेका छन् । उक्त समूहमा भारत, आयोजक अमेरिका र आयरल्यान्ड पनि रहेका छन् । समूह ए मा रहेका पाँचवटै टोलीले दुई–दुई खेल खेलिसकेका छन् । जसमा चार अंकसहित भारत पहिलो र चार अंकसहित अमेरिका दोस्रो र दुई अंकसहित क्यानडा तेस्रो स्थानमा रहेका छन् ।
हालसम्म पाकिस्तान र आयरल्यान्डले भने खाता खोल्न सकेका छैनन् । यस्तो अवस्थामा पाकिस्तानी टोली आज राति हुने खेल जित्नैपर्ने दबाबमा छ । क्यानडासँग पराजित भए पाकिस्तानी टोली जारी विश्वकपको समूह चरणबाटै बाहिरिने पक्का छ । अर्कोतिर क्यानडा पनि पाकिस्तानलाई पराजित गर्दै सुपर–८ मा आफ्नो स्थान बलियो बनाउने धुनमा रहेको छ । टी–२० विश्वकपमा पाकिस्तानी टोलीको यो नवौँ सहभागिता हो ।
पाकिस्तानले सन् २००७ मा सम्पन्न पहिलो संस्करणदेखि नै नियमित रुपमा टी–२० विश्वकपमा आफ्नो सहभागिता जनाउँदै आएको छ । यता क्यानडाको भने टी–२० विश्वकपमा यो नै पहिलो सहभागिता हो । पाकिस्तान टी–२० विश्वकपको पूर्वविजेता पनि हो । पाकिस्तानले सन् २००९ मा सम्पन्न दोस्रो संस्करणको उपाधि चुमेको थियो ।
त्यतिबेला पाकिस्तानी टोलीले फाइनलमा श्रीलंकालाई ८ विकेटले पराजित गरेको थियो । पाकिस्तानले हालसम्म टी–२० विश्वकपमा ४९ खेल खेलिसकेको छ । त्यसमध्ये २८ खेलमा विजयी भएको छ भने १९ खेलमा पराजित भएको छ । पाकिस्तानी टोलीको दुई खेल भने बराबरीमा सकिएको छ । क्यानडाले भने टी–२० विश्वकपमा हालसम्म केवल दुई खेल खेलेको छ । क्यानडाले एक खेलमा जित र एक खेलमा हारको नतिजा निकालेको छ ।
अन्तर्राष्ट्रिय क्रिकेट काउन्सिलद्वारा घोषित पछिल्लो टी–२० अन्तर्राष्ट्रिय वरीयतामा पाकिस्तान छैटौँ र क्यानडा २३औँ स्थानमा छन् । वरीयतालाई आधार मान्दा क्यानडाभन्दा पाकिस्तानी टोली निकै बलियो देखिन्छ । तर, पछिल्लो समय पाकिस्तानी टोली लयमा देखिएको छैन् ।
टी–२० क्रिकेटमा भने हालसम्म पाकिस्तान र क्यानडाबीच एकपटक मात्रै भिडन्त भएको छ । जुन खेलमा पाकिस्तानले क्यानडालाई ३५ रनले पराजित गरेको थियो ।
प्रतिक्रिया