वेष्ट इन्डिजमा हुने विश्वकपका दुई खेल खेल्दै सन्दीप, कस्लाई गरे प्रतिस्थापन ?

एजेन्सी । क्रिकेटर सन्दीप लामिछाने जारी आईसीसी टी–२० विश्वकप खेल्न वेष्ट इन्डिज प्रस्थान गरेका छन् ।

सन्दीपले वेष्ट इन्डिजमा विश्वकपका दुई खेलमा आफ्नो सहभागिता जनाउने छन् । नेपालले दक्षिण अफ्रिका र बंगलादेशविरुद्ध खेल्ने खेलमा सन्दीपको सहभागिता रहने पक्का भएको छ । नेपालले आगामी शनिबार दक्षिण अफ्रिका र सोमबार बंगलादेशको सामना गर्नेछ । त्यसअघि बुधबार बिहान श्रीलंकासँग हुने खेलका लागि सन्दीप टोलीमा हुने छैनन् । अमेरिकाले भिषा नदिएपछि उनी दुई खेलमा उपस्थित हुन पाएनन् ।

क्यानका अनुसार सन्दीप नेपाली राष्ट्रिय क्रिकेट टोलीमा समावेश हुने छन् । उच्च अदालत पाटनले गत मे १५ मा बलात्कार मुद्धामा सफाइ दिएसँगै सन्दीपलाई टोलीमा समावेश गरेको थियो ।

सन्दीपलाई समावेश गर्दै युवा बलर प्रतिश जिसीलाई ट्राभलिङ रिजर्भमा राख्ने निर्णय गरेको क्यानले जनाएको छ ।