काठमाडौं । आईसीसी टी–२० विश्वकप क्रिकेटमा १० बर्षपछि पुनरागमन गरेको नेपालले आज आफ्नो पहिलो खेल नेदरल्यान्ड्स सँग खेल्दै छ ।
नेपालले यसअघि सन् २०१४ मा पहिलो पटक टी–२० विश्वकप खेलेको थियो । गएको कात्तिकमा मूलपानीस्थित माथिल्लो क्रिकेट मैदानमा भएको एशिया छनोट खेलमा नेपालले संयुक्त अरब इमिरेट्स (यूएई) लाई सेमिफाइनलमा पराजित गर्दै नेपालले विश्वकपमा आफ्नो स्थान पक्का गरेको थियो ।
नेपालले दोस्रोपटक टी–२० विश्वकपमा सहभागिता जनाउँदा नेदरल्यान्ड्स भने पाँचौपटक सहभागि हुँदैछ । नेपाल र नेदरल्यान्ड्स दुवै चिरपरिचि प्रतिद्वन्द्वी हुन् । तीन महिनाअघि मात्रै नेपालमा भएको त्रिदेशीय टी–२० शृङ्खलामा नेदरल्यान्ड्सले दुई खेल जित्दा नेपालले एक खेलमा जित हाँसिल गरेको थियो ।
अमेरिकाको डालसस्थित ग्राण्ड प्रेरी रङ्गशालामा आज राति हुने उक्त खेलमा नेपालले विजयी लक्ष्य हासिल गर्ने उद्देश्यका साथ मैदानमा उत्रँदैछ । त्यसो त नेदरल्यान्ड्स पनि आफ्नो पहिलो खेलमा जित हासिल गर्दै आगामी यात्रालाई सहज बनाउने कोसिसमा रहनेछ । विश्वकपमा नेपालर नेदरल्यान्ड्स समूह डी मा रहेका छन् । नेपाल रहेको उक्त समूहमा टेस्ट मान्यता प्राप्त राष्ट्र दक्षिण अफ्रिका, श्रीलंका र बंगलादेश पनि रहेका छन् ।
सोमबार राति भएको समूह डी को पहिलो खेलमा श्रीलंकालाई दक्षिण अफ्रिकाले ६ विकेटले हराएको थियो । समूह डी को दोस्रो खेलमा आज नेपाल र नेदरल्यान्ड भिड्दैछन् । नेपालका दीपेन्द्रसिंह ऐरी प्रमुख अलराउण्डर हुन् । दीपेन्द्रले ब्याटिङ, बलिङ र फिल्डिङ तीनै क्षेत्रमा राम्रो प्रदर्शन गर्दै आएका छन् । यस्तै आजको खेलमा नेपालका ओपनरद्वय कुशल भुर्तेल र आसिफ शेखले राम्रो सुरुवातको अपेक्षा पनि गरिएको छ ।
विगतमा नेपाल र नेदरल्यान्डबीच भएका टी–२० आईको नतिजा यस्तो छ…
नेपाल र नेदरल्यान्ड्सबीच हालसम्म टी–२० आईमा १२ खेल भएका छन् । टी–२० आईको हेड टु हेडमा नेपाल ५ खेलमा विजयी भएको छ भने ६ खेलमा पराजित र १ खेल नतिजाविहीन छ । टी–२० विश्वकपमा भने नेपाल र नेदरल्यान्ड्सको पहिलो भेट हो ।
नेपाल २०१५ जुलाईमा चार टी–२० आई सिरिज खेल्न् नेदरल्यान्ड्स गएको थियो ।
जतिबेला नेपाल पहिलो खेलमा १६ रनले पराजित रहेको थियो । त्यस्तै दोस्रो खेलमा १ सय ३ रनले पराजित भएको थियो । उक्त खेलमा नेपाल १ सय ७३ रनको लक्ष्य पछ्याउने क्रममा ६९ रनमै अल आउट हुन पुगेको थियो । तेस्रो खेलमा पनि नेपाल १८ रनले पराजित भएको थियो भने सिरिजको चौथो खेलमा भने नेपालले ३ विकेटको जित हात पारेको थियो ।
त्यसपछि २०१८ मा नेपाल र नेदरल्यान्ड्सबीच इंग्ल्यान्डको लड्र्समा खेल भएको थियो । उक्त खेलमा नेदरल्यान्ड्स १६ दशमलव ४ ओभरमा १७४–४ को अवस्थामा हुँदा बर्षाका खेल रद्द भएको थियो । यस्तै २०१९ मा ओमानमा भएको पाँच देश सम्मिलित सिरिजमा नेपालले नेदरल्यान्ड्सलाई ४ विकेटले हराएको थियो ।
त्यसपछि २०२१ मा घरेलु मैदानमा नेपालले त्रिकोणात्मक सिरिजको पहिलो खेलमा नेदरल्यान्ड्सलाई ९ विकेटले हराएको थियो । दोस्रो खेलमा नेपाल नेदरल्यान्ड्स सँग ३ विकेटले पराजित भएको थियो । उक्त खेलमा नेपालले दिएको २ सय ७ रनको लक्ष्य नेदरल्यान्ड्सले १९ दशमलव ३ ओभरमा पुरा गरेको थियो । उक्त त्रिकोणान्मक सिरिजको फाइनलमा नेपालले दिएको २३० रनको लक्ष्य पछ्याएको नेदरल्यान्ड्स १७ दशमलव २ आभेरमा ९६ रनमा अल आउन भएको थियो ।
२०२४ को मार्चमा नेपाल, नेदरल्यान्ड्स र नामिबियाबीचको त्रिकोणात्मक सिरिज पनि टीयू क्रिकेट मैदानमा नै भएको थियो । उक्त सिरिजको पहिलो खेलमा नेपाल नेदरल्यान्ड्स सँग २ रनले पराजित भएको थियो । दोस्रो खेलमा नेदरल्यान्ड्सलाई १ सय २० रनमा अल आउट गर्दै नेपालले ६ विकेटको फराकिलो जित हात पारेको थियो ।
फाइनलमा भने नेपालले दिएको १ सय ८५ रनको लक्ष्य नेदरल्यान्ड्सले १९ दशमलव ३ ओभरमा ६ विकेट गुमाउँदै पूरा गरेको थियो ।
प्रतिक्रिया