वैशाख १३ गते बिहीबार दिनभर के–के भयो ?

१.पूर्वमन्त्री अफताव आलमलाई जन्मकैदको फैसला
नेपाली कांग्रेसका नेता तथा पूर्वमन्त्री अफताव आलमलाई जन्मकैदको फैसला भएको छ । रौतहटमा बम विष्फोटका घाइतेलाई ज्यूँदै इट्टभट्टामा जलाएको आरोप लागेका कांग्रेस नेता आलमलाई रौतहट जिल्ला अदालतले २० बर्ष कैदको फैसला सुनाएको हो । न्यायाधीश मातृकाप्रसाद आचार्यको इजलासले उनलाई विस्फोटक पदार्थ बमसमेतको प्रयोग गरी ज्यान मार्ने उद्योग तथा कर्तव्य ज्यान सम्बन्धी कसुरमा दोषी ठहर गरेको हो ।

२.नक्कली भुटानी शरणार्थी प्रकरणः छुटे कांग्रेस नेता शेर्पा
नक्कली भुटानी शरणार्थी प्रकरणमा थुनामा रहेका पूर्वसाँसद एवं नेपाली कांग्रेसका नेता आङटावा शेर्पालाई ३० लाख धरौटीमा छाड्न सर्वोच्च अदालतले आदेश दिएको छ । न्यायाधीश कुमार रेग्मी र टेकप्रसाद ढुंगानाको संयुक्त इजलासले शेर्पालाई पुर्पक्षका लागि थुनामा राख्ने जिल्ला अदालत काठमाडौं र उच्च अदालत पाटनको आदेश बदर गरेको हो । यस्तै उच्चले थुनामा पठाएका गोबिन्दकुमार चौधरीलाई पनि सर्वोच्चले धरौटीमा छाड्न आदेश दिएको छ ।

३.टोपबहादुरलाई धरौटीमा छाड्न सर्वोच्चको अस्वीकार
नक्कली भुटानी शरणार्थी प्रकरणमा थुनामा रहेको एमाले नेता टोपबहादुर रायमाझीलाई धरौटीमा छाड्न सर्वोच्च अदालतले अस्वीकार गरेको छ । न्यायाधीशद्वय कुमार रेग्मी र टेकप्रसाद ढुङ्गानाको संयुक्त इजलासले रायमाझीसहित ७ जनालाई थुनामै राख्न आदेश दिएको हो ।

४.उपनिर्वाचन सुरक्षामा कडाई
वैशाख १५ मा इलाम र बझाङमा हुन लागेको प्रतिनिधिसभा र प्रदेशसभाको निर्वचनमा प्रहरीले ३ चरणको सुरक्षा योजना बनाएर लागू गरेको छ । निर्वाचन पूर्व, निर्वाचन अवधि र निर्वाचन पश्चात गरि ३ चरणको सुरक्षा योजना लागू गरिएको प्रहरीले जनाएको छ । जसमा इलाम–२ मा १ हजार ३ सय ६३ र बझाङमा १ हजार २४ जना प्रहरी परिचालन गरिने प्रहरीले जनाएको छ ।

५.सेना परिचालनको तयारी
इलाम–२ र बझाङमा हुन लागेको उपनिर्वाचनका लागि सेना परिचालन गर्न राष्ट्रपति रामचन्द्र पौडेलले स्वीकृति दिएका छन् । निर्वाचनलाई स्वच्छ, निष्पक्ष, स्वतन्त्र र भयरहित बनाउनका लागि राष्ट्रिय सुरक्षा परिषद्को सिफरिस र मन्त्रिपरिषद्को निर्णयका आधारमा राष्ट्रपति पौडेलले बिहीबार सेना परिचालनको स्वीकृति दिएका हुन् ।

६.सहकारी पीडितलाई न्याय दिने नयाँ मार्ग
सरकारले विद्यमान कानून र संरचनाबाट सहकारीको समस्या समाधान गर्न सम्भव नभएको निष्कर्ष निकालेको छ । सहकारी पीडितको समस्या सम्बोधन गर्न फास्ट ट्रर्याकबाट कानुन बनाउने सरकारको तयारी छ । बिहीबार बसेको मन्त्रिपरिषद्का् बैठकमा सहकारीको समस्याबारे भएको छलफलमा नियमित प्रक्रियाबाट समस्या समाधान नहुने र त्यसका लागि छुट्टै कानुन आवश्यक पर्ने निष्कर्ष सरकारले निकालेको थियो ।

७.मुख्यमन्त्री कँडेलले पाए विश्वासको मत
कर्णाली प्रदेशका मुख्यमन्त्री यामलाल कँडेलले प्रदेशसभाबाट विश्वासको मत पाएका छन् । बिहीबार बसेको प्रदेशसभाको बैठकमा कँडेलको पक्षमा २३ मत परेको थियो । कुल ४० सदस्य रहेको कर्णाली प्रदेशसभामा आजको बैठकमा ३६ सांसद उपस्थित रहेका थिए । जसमध्ये विश्वासको मतको पक्षमा २३, विपक्षमा १२ र १ मत तटस्थमा परेको थियो ।

८.अर्थमन्त्री पुनको सक्रियता
अर्थमन्त्री बर्षमान पुनले आगमी आर्थिक बर्ष २०८१÷८२ को बजेटमा समेट्नु पर्ने बिषयबारे अर्थविद्हरुसँग राय लिएका छन् । बिहीबार अर्थ मन्त्रालयमा आयोजित छलफलमा अर्थमन्त्री पुनले निजी क्षेत्रलाई उत्साहित बनाउन केही ‘बोल्ड’ निर्णय गर्नुपर्ने अवस्था आएको पनि बताए । सरकारी स्रोतमा भएको सीमितताका कारण सरकारले कडाइ गर्नुपर्ने र निजी क्षेत्रले खुकुलो वातावरण चाहेका कारण सन्तुलन मिलाउनुपर्ने चुनौती रहेको अर्थमन्त्री पुनको भनाइ छ ।

९.कोशीका मुख्यमन्त्री कार्कीलाई संकट
कोशी प्रदेशका मुख्यमन्त्री केदार कार्कीसँग प्रदेशसभामा बहुमत नरहेको जानकारीसहितको पत्र प्रदेश प्रमुखको कार्यालयमा पुगेको छ । ७ बैशाखमा कोशी प्रदेशसभा बैठकले मुख्यमन्त्री कार्कीलाई प्रदेशसभामा विश्वासको मत लिन निर्देशन दिने संकल्प प्रस्ताव पारित गरेको थियो । उक्त संकल्प प्रस्ताव पारित भएको जानकारी प्रदेशसभा सचिवालयले प्रदेश प्रमुखको कार्यालयमा पाठाएको छ ।

१०.बर्तमान सत्ता गठबन्धनमा खटपट सुरु
नेकपा माओवादी केन्द्रका उपमहासचिव मातृकाप्रसाद यादवले सत्ता समीकरण रहने वा नरहने बिषय एमाले अध्यक्ष केपी ओलीमा भर पर्ने बताएका छन् । वर्तमान सरकार ढाल्न कांग्रेस र एमालेबीच पहिलेदेखि नै कसरत भएपनि सफल नहुने उनको दाबी थियो । साथै नयाँ समीकरण बनाउने बेला संघको मात्र हिसाब किताब भएकाले समस्या आएको उनको बुझाइ छ । समीकरण भत्काउनुअघि सबै प्रदेशको हिसाब गरेको भए समस्या नआउने समेत उनले जिकिर गरेका छन् ।

११.कांग्रेस नेता पौडेलको जोड
नेपाली कांग्रेसका नेता प्रदीप पौडेलले रुसी सेनामा भर्ना भएका नेपालीको अवस्थाबारे परराष्ट्र मन्त्रालयले समितिमा जवाफ दिनुपर्ने माग गरेका छन् । मन्त्रालयले सबै नेपालीलाई स्वदेश ल्याउनुपर्नेमा जोड दिँदै नेता पौडेलले त्यहाँ मारिएका तथा सम्पर्कविहीन भएकाको तथ्याङ्क परराष्ट्र मन्त्रालयले उपलब्ध गराउनुपर्नेमा अडान कसेका छन् । बुधबार प्रतिनिधिसभाको अन्तर्राष्ट्रिय सम्बन्ध र पर्यटन समितिमा ध्यानाकर्षण पत्र दायर गर्दै उनले रुसी सेनामा भर्ना भएका, त्यहाँ ज्यान गुमाएका तथा परिवारको सम्पर्कमा नआएका नेपालीको यकिन तथ्याङ्क उपलब्ध गराउन समितिको ध्यानाकर्षण गराएका हुन् ।

१२.वैदेशिक रोजगारमा जाने श्रमिकको पक्षमा निर्णय
वैदेशिक रोजगार विभागले वैदेशिक रोजगारीमा जाने नेपाली श्रमिकहरूको हवाई भाडा तथा सुविधाको उचित व्यवस्थापन गर्नका लागि नेपाल नागरिक उड्डयन प्राधिकरण, वैदेशिक रोजगार व्यवसायी महासंघ र नेपाल एसोसियसन अफ टुर एण्ड ट्राभललाई आग्रह गरेको छ । विभागले बुधबार पत्राचार गरी हवाई टिकटमा नै खाना, खाजा तथा पानीको सुविधा हुने गरी उचित मूल्यको व्यवस्थापन गर्न आग्रह गरेको हो ।