धनगढी । सुदूरपश्चिम प्रदेशको मुख्यमन्त्रीमा नागरिक उन्मुक्ति पार्टी (नाउपा) का कैलाश चौधरी र लक्ष्मणकिशोर चौधरीले दाबी पेश गरेका छन् ।
नेपाली कांग्रेस, नागरिक उन्मुक्ति पार्टीका संरक्षक रेशम चौधरी पक्ष र एकीकृत समाजवादी पार्टीको समर्थनमा लक्ष्मणकिशोर चौधरीले पहिला प्रदेशप्रमुख समक्ष आफ्नो दावी पेश गरेका थिए । लक्ष्मणले आइतबार दिउँसो प्रदेश प्रमुख नजीर मियाँलाई कांग्रेसका १८, नाउपाका ६ र एकीकृत समाजवादीका ४ जनाको समर्थन रहेको दाबीसहित मुख्यमन्त्री नियुक्ति गर्न पत्र दिएका थिए ।
यता, कैलाशले भने नेकपा एमाले, नेकपा माओवादी केन्द्र र नाउपा अध्यक्ष रञ्जिता श्रेष्ठ पक्षको समर्थन लिएर मुख्यमन्त्रीमा दाबी पेश गरेका छन् । कैलाशलाई एमालेका १० र माओवादीका ११ प्रदेशसभा सदस्यको समर्थन रहेको छ । यसरी एउटै पार्टीबाट दुई जनाले मुख्यमन्त्रीमा दाबी पेश गरेपछि कसलाई मुख्यमन्त्री नियुक्त गर्ने भन्ने बिषयमा प्रमुख प्रमुख मियाँ यतिबेला कानूनी परामर्शमा रहेका छन् ।
उनले दुवै पक्षबाट मुख्यमन्त्रीमा दाबी पेश गरेकाले आफुँले कानूनी परामर्शपछि मात्रै निर्णय गर्ने जवाफ दिएका छन् ।
प्रतिक्रिया