सुर्खेत । सत्ता गठबन्धनको सोमबार बसेको बैठकले कर्णाली प्रदेशको नेतृत्व एमालेले पाउने सहमति भएको छ ।
सोही अनुसार नै प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले कर्णाली सरकारको नेतृत्व एमालेलाई छोडेर आवश्यक सहयोग गर्न प्रदेश इन्चार्ज कालीबहादुर मल्ल र मुख्यमन्त्री शर्मालाई निर्देशन दिएका छन् । तर, कर्णलीका मुख्यमन्त्री शर्मा भने मंगलबारको प्रतिनिधिसभामा विश्वासको मत लिने तयारीमा जुटेका छन् ।
प्रचण्डको निर्देशनलाई इन्कार गर्दै मुख्यमन्त्री शर्मा आफ्नो तरिकाले विश्वासको मत लिने बाटोमा अघि बढेपछि यतिबेला कर्णाली माओवादीमा विवाद चुलिएको छ । केन्द्रमा सत्ता समीकरणमा फेरबदल आएपछि २२ फागुनमा तत्कालीन सत्ता साझेदार कांग्रेसले मुख्यमन्त्री शर्मालाई दिएको समर्थन फिर्ता लिएको थियो ।
सरकारमा सहभागी कुनै दलले समर्थन फिर्ता लिएमा मुख्यमन्त्रीले ३० दिनभित्र विश्वासको मत लिनुपर्ने संवैधानिक व्यवस्था छ । सोही अनुसार प्रदेश सभाबाट विश्वासको मत लिने गरी आइतबार मुख्यमन्त्री शर्माले संसद् सचिवालयलाई पत्र समेत पठाएका थिए ।
मुख्यमन्त्रीको पत्र अनुसार नै संसद् सचिवालयले मंगलबार दिउँसो ३ बजेका लागि प्रदेश सभाको बैठक आह्वान गरेको छ ।
प्रतिक्रिया