दोलखाबाट चार किलो सुन बरामद, तीन जना पक्राउ

चरिकोट । दोलखाको सिँगटीबाट चार किलो सुन बरामद भएको छ ।

दोलखाका गरिव भुजेल परिवारलाई सुन माफिया र तस्करहरुले आर्थिक प्रलोभनमा पारेर उनीहरुका नाममा कम्पनी दर्ता गरेर सुन तस्करी गरिरहेको तथ्य पर्दाफास भईरहेका बेला दोलखाको सिँगटीबाट ४ किलो सुन बरामद भएको हो । प्रहरीले यो सुन हिजो राती (बुधबार राती) बरामद गरेको हो । सुन करिव ४ किलो जति रहेको प्रहरीले जनाएको छ ।

सुनसहित तीनजनालाई प्रहरीले पक्राउ गरेको छ । दोलखाका प्रहरी प्रमुख डिएसपी दीपक खड्काका अनुसार इलाका प्रहरी कार्यालय सिँगटीको टोलीले सुन बरामद गरेको हो । लप्ची नाकाको लामाबगर हुँदै तस्करहरूले सुन भित्र्याएको अनुमान गरिएको छ ।

‘करिब चार केजी सुनसहित तीनजना पक्राउ परेका छन्, अहिले मुचुल्का उठाइएको छ,’ डिएसपी खड्काले भने, ‘बिहीबार सार्वजनिक गर्छौँ ।’ एक साताअघि मात्रै दोलखाको लप्ची नाका खुला गरिएको थियो ।