काठमाडौं । त्रिभुवन अन्तर्राष्ट्रिय विमानस्थलबाट बाहिरिएको करिब १ सय किलो सुन तस्करीमा संलग्न आरोपमा बिहीबार साँझ काठमाडौं बाट थप दुई जना पक्राउ परेका छन् ।
राजस्व अनुसन्धान विभागले काठमाडौंको कोटेश्वरबाट राजन श्रेष्ठ र पुष्करराज भट्टलाई पक्राउ गरेको हो । भट्ट ट्रान्स ग्लोबल सर्भिसका सञ्चालक हुन् । राजस्व अनुसन्धान विभागले सशस्त्र प्रहरी बलसँगको समन्वयमा ५ वटा टोली बनाएर अपरेशन गरिरहेको छ । सो ‘विशेष अपरेशन’को कमाण्ड राजस्व अनुसन्धान विभागका महानिर्देशक नवराज ढुंगानाले गरेका छन् ।
सशस्त्र प्रहरीका डिएसपी प्रदिप राईसहितको सशस्त्रको टिम अपरेशनमा खटिएको छ । बिहिबार दिउँसो चिन उड्न लागेका चिनियाँ नागरिक लिङ चुवानलाई पनि सुन ओसार पसारमा संलग्न भएको आरोपमा पक्राउ गरिएको थियो । अहिलेसम्म पक्राउ पर्नेहरुको संख्या ९ जना पुगेको छ ।
बुधबार राति सुन ओसारपसारमा संलग्न अरोपमा ६ जनालाई राजस्व अनुसन्धान विभागले पक्राउ गरेको थियो । पक्राउ पर्नेमा दोलखा मेलुङ गाउँपालिका–३ घर भएका राम कुमार भुजेल, दिलिप भुजेल, भोजपुर अरुण गाउँपालिका–४ घर भएका हर्कराज राई र भारतिय नागरिक थाप्तेन छिरिङ छन् ।
प्रतिक्रिया