बारामा रास्वपाका रमेश खरेलसहित ३१ उम्मेदवारको जमानत जफत

काठमाडौं । बारा–२ को उपनिर्वाचनमा उम्मेदवार रहनुभएका राष्ट्रिय स्वतन्त्र पार्टी (रास्वपा)का रमेश खरेलको जमानत जफत भएको छ ।

तनहुँ–१, चितवन–२ र बारा–२ मध्ये तीन क्षेत्रमा भएको उपनिर्वाचनमा दुईवटा क्षेत्र जितेको रास्वपाले बारामा भने जमानत समेत जोगाउन नसकेको हो । बुधबार बिहान आएको अन्तिम परिणाम अनुसार रास्वपाका उम्मेदवार खरेलले २ हजार ८२९ मत प्राप्त गर्नुभएको छ । मुख्य निर्वाचन अधिकृतको कार्यालयका अनुसार ६९ हजार २२ मत खसेकोमा ६८ हजार १९२ मत सदर भएको छ ।

रास्वपाका उम्मेदवार खरेलले जम्मा मतको ४.१४ प्रतिशत मात्र पाएपछि जमानत जफत भएको हो । निर्वाचनमा कुल सदर मतको १० प्रतिशत मत नल्याउने उम्मेदवारको जमानत जफत हुने प्रावधान छ । बारा–२ मा ३४ उम्मेदवारमध्ये तीन जनाले मात्र जमानत जोगाएका छन् ।

बाँकी ३१ उम्मेदवारको जमानत जफत भएको मुख्य निर्वाचन अधिकृत कार्यालयले जनाएको छ ।