प्रधानमन्त्री दाहालविरुद्धको मुद्दाको सुनुवाइ भोलि हुने

काठमाडौं । प्रधानमन्त्री पुष्पकमल दाहाललाई पक्राउ गरी व्यक्ति हत्यामा कारबाही चलाउन आदेशको माग गर्दै सर्वोच्च अदालतमा परेका दुईवटा रिटको सुनुवाई आज नहुने भएको छ ।

न्यायाधीश विश्वम्भरप्रसाद श्रेष्ठको इजालसले दाहालविरुद्धको मुद्दा आज हेर्न नभ्याइएकाले शुक्रबारको लागि सारेको अदालतले जनाएको छ । दाहालले २०७६ माघ १ गते एक कार्यक्रममा द्वन्द्वकालमा मारिएका १७ हजार मध्ये पाँच हजार नागरिकको जिम्मा आफूले लिने अभिव्यक्ति दिएका थिए । सोही अभिव्यक्तिलाई आधार बनाइ प्रचलित कानुन बमोजिम पक्राउ गरी सजाय गर्न माग गर्दै रिट दर्ता भएको थियो ।

द्वन्द्वपीडितका तर्फबाट अधिवक्ता ज्ञानेन्द्र आरण र कल्याण बुढाथोकीले गत मंगलबार दुईवटा रिट दर्ता गराएका हुन् ।