धनुषा । अवैध उत्खननको विरोध गर्दै आएको दिलीप महतोको हत्यामा संलग्न दुई जनालाई जिल्ला अदालत धनुषाले दुई जनालाई २५/२५ वर्ष कैद सजाय सुनाएको छ ।
जिल्ला अदालतका न्यायाधीश चित्रबहादुर गुरुङको इजलासले विपिन र मुनिन्द्रलाई उक्त सजाय सुनाएको हो । त्यस्तै हत्यामा संलग्न जितेन्द्र महतोलाई भने १२ वर्ष कैद सजाय सुनाइएको छ । जितेन्द्रलाई २ लाख ५० हजार जरिवाना समेत गरिएको छ। अभियुक्त विपिन र मुनिन्द्रलाई अदालतले ५/५ लाख जरिवाना पनि तोकेको छ ।
गत फागुन २ गते अदालतले विपिन र मुनीन्द्रलाई दिलीपको मनसायपूर्वक हत्या गरेकामा दोषी ठहराइएको थियो । जितेन्द्रलाई हत्याको मतियार भएकामा कसुरदार ठहराए पनि अदालतले शुक्रबार मात्र फैसला निर्धारण भएको हो । हत्याको अभियोग लागेका उद्योग सञ्चालक विनोद महतो र कामदारहरू सत्यनारायण महतो, शत्रुघन महतो र रोशनकुमार महतोले भने सफाइ पाएका छन् ।
घर अगाडिको औरही खोलाबाट भइरहेको ढुंगा, गिट्टी र बालुवाको अवैध उत्खननको विरोध गर्दा दिलीप भनिने ओमप्रकाश महतोको २०७६ पुस २५ गते मृत्यु भएको थियो ।
प्रतिक्रिया