काठमाडौं । कैलाली क्षेत्र नंबर २ बाट निर्वाचित प्रतिनिधिसभा सांसद अरूण चौधरी रिहा भएका छन् ।
कैलाली जिल्ला कारागारमा रहेका उनी राष्ट्रपति विद्यादेवी भण्डारीबाट सजाय मिनाहा पाएसँगै रिहा भएका हुन् । उनलाई कारागार चलान गरिएको १८ दिन भएको थियो । राष्ट्रपति कार्यालयले शुक्रबार विज्ञप्ती जारी गर्दै प्रजातन्त्र दिवसको उपलक्ष्यमा तीन सय ९५ जनाको कैद सजाय माफी दिने जनाएको थियो ।
कैलाली कारागारमा रहेका सांसद चौधरीसहित अन्य १४ जनाको पनि कैद मिनाहा माफी गरिएको छ । सांसद चौधरीले ढुंगा लिन चिसापानीस्थित गोरांगा खोलाबाट ढुंगा लोड गरी लम्कीतर्फ आउँदै गरेका चालक साजन चौधरीलाई ८/१० जनासहित कुटपिट गरी ट्याक्टरमा आगो लगाइ आठ लाख ७५ हजार रूपैयाँको क्षति पुर्याएको भन्दै मुद्दा परेको थियो । यही मुद्दामा उनलाई कैलाली जिल्ला अदालतले २०७० बैशाख ९ गते दोषी ठहर गरेको थियो ।
उक्त घटनामा दोषी ठहर गर्दै चौधरीलाई अदालतले ६ महिनाको कैद सजायसहित आठ लाख १९ हजार २३ रूपैयाँ जरिवानाको सजाय सुनाएको थियो ।
प्रतिक्रिया