सुरक्षा अभिनीत चलचित्र ‘बहाव’ चैत २४ मा आउने

काठमाडौं । अभिनेत्री सुरक्षा पन्त र अभिनेता कमलमणि नेपाल अभिनीत नेपाली चलचित्र ‘बहाव’को पोस्टर सार्वजनिक भएको छ ।

पोस्टरसँगै फिल्मको प्रदर्शन मिति पनि निर्माण पक्षले घोषणा गरेको छ। अभिनेत्री पन्त र अभिनेता नेपालको मुख्य भूमिका रहेको फिल्म आगामी चैत २४ मा प्रदर्शनमा आउने भएको छ । प्रमोद कँडेलको लेखन र निर्देशन रहेको चलचित्रको पोस्टरमा अभिनेत्री पन्तले सुगासहितको पिँजडालाई हातमा लिएर उभिएकी छन् ।

हातमा रहेको पिँजडाभित्रको सुगामा आफ्नो प्रतिबिम्ब खोजिरहेको देख्न सकिन्छ। फिल्मको विषयवस्तु ‘जिज्ञासा, विचार अनि यथार्थको कथा’ मा आधारित रहेका निर्माण पक्षले जनाएको छ। स्वर्णिम इन्टरटेनमेन्ट र योङ स्टार सिनेमाको प्रस्तुतीमा बनेको यो चलचित्रको विषयवस्तु ‘जिज्ञासा, विचार अनि यथार्थको कथा’ मा आधारित रहेको बताईएको छ ।

निर्देशक कँडेलले यो चलचित्रको बिषय नयाँ चिजको खोजीमा भइरहेको अवस्थाको विद्रोह रहेको बताए । चलचित्रका निर्माता श्रीधर पौडेल हुन् । चलचित्रमा सुरक्षा र कमलमणिसँगै अफरान अली, सुर्य शर्मा भट्ट, इश्वरी सिंह, हीरालाल कँडेल र पवन श्रेष्ठको अभिनय छ ।

सुजन बडालको सम्पादन, वसन्त सापकोटा, सुशान्त गौतम र रिकेश गुरुङको सङ्गीत रहेको फिल्ममा सज्जा चौलागाईंको स्वर, अनन्त घिमिरेको कलर करेक्सन, मुकेश शाहको साउण्ड डिजाइन र मिक्सिङ र कार्तिकेय स्मिता कर्नाटकको छायाङ्कन छ ।