काठमाडौं । चिकित्सकमाथी भरएको आक्रमणको विरोधमा आन्दोलनरत चिकित्सकका प्रतिनिधि र सरकारी टोलीबीच सिंहदरबारमा बिहानैदेखि वार्ता भइरहेको छ ।
राष्ट्रपतिको सवारीको क्रममा हिडेको भन्दै ट्रमा सेन्टरका डा. जनिथलाल सिंहमाथी कुटपिट गरेको घटनामा नेपाल चिकित्सक संघले आन्दोलन घोषणा गरेपछि समस्या समाधानका लागि दुई पक्ष वार्तामा जुटेका हुन् । वार्तामा सरकारको तर्फबाट प्रधानमन्त्री कार्यालयका सचिव डा. गणेश पाण्डे र चिकित्सकहरुको तर्फबाट नेपाल चिकित्सक संघका अध्यक्ष डा. लोचन कार्की नेतृत्वको टोली सहभागी छन् । प्रधानमन्त्री तथा मन्त्रिपरिषदको कार्यालयमा जारी वार्तामा ट्रमा सेन्टरका निर्देशक रुद्र मरासिनीसमेत सहभागी छन् ।
माघ २७ गते राष्ट्रपति विद्यादेवी भण्डारीको सवारीको क्रममा ट्रमा सेन्टरका एक चिकित्सकलाई सुरक्षाकर्मीले लाठी प्रहार गरेर घाइते बनाएको भन्दै नेपाल चिकित्सक संघको आह्वानमा चिकित्सकहरुले आज देशभरका स्वास्थ्य संस्थामा आकस्मिक बाहेकका सेवा बन्द गरेका छन् । स्वास्थ्य मन्त्रालयले आन्दोलन फिर्ता लिन र नियमित सेवामा खटिन पनि नेपाल चिकित्सक संघलाई आह्वान गरेको छ । उक्त घटनामा प्रहरीले डाक्टरमाथि लाठी चार्ज गर्ने प्रहरीलाई निलम्बन गरी अनुसन्धान प्रक्रिया अघि बढाएको छ ।
प्रतिक्रिया