सुदूरपश्चिम प्रदेशसभा बैठक ४ बजेलाई सारियो, विपक्षीको विरोध

धनगढी । सुदूरपश्चिम प्रदेशसभाको बिहीबार दिउँसो १ बजेलाई बोलाइएको बैठक दिउँसो ४ बजेलाई सारिएको छ ।

मुख्यमन्त्री राजेन्द्र रावलले विश्वासको मत लिने प्रयोजनका लागि बिहीबार प्रदेशसभा बैठक बोलाइएको हो । तर अहिलेसम्म मुख्यमन्त्रीको पक्षमा सदनको बहुमत जुटेको छैन । बहुमतका लागि निर्णायक मानिएको ७ प्रदेशसभा सदस्य रहेको दल नागरिक उन्मुक्ति पार्टीले विश्वासको मत नदिने भएसंगै सुदुरपश्चिम प्रदेश सरकार संकटमा परेको छ ।

तर सहमतिको सम्भावना खोजीका लागि सभामुखले बैठक सारेका हुन् । मुख्यमन्त्री रावलले बिहीबार विश्वासको मत लिनैपर्ने संवैधानिक बाध्यता छ । उनले विश्वासको मत लिन नसकेमा स्वतः पदमुक्त हुन्छन् । प्रदेशसभा बैठक सारिएको भन्दै विपक्षी दलका नेताहरुले विरोध गरिरहेका छन् ।