मृत्यु हुनेको संख्या ८ हजार नजिक, ३५ हजार बढी घाइते

एजेन्सी । टर्की र सिरियामा सोमबार गएको शक्तिशाली भूकम्पका कारण ज्यान गुमाउनेको संख्या ८ हजार नजिक पुगेको छ ।

त्यस्तै घाइते हुनेको संख्या झन्डै ३५ हजार नाघेको छ । ज्यान गुमाउनेमा टर्कीमा ५ हजार ८ सय ९४ र सिरियामा २ हजार ३२ रहेको छन् । टर्कीमा भूकम्पका कारण करिब ६ हजार भौतिक संरचना ध्वस्त भएका छन् भने सिरियामा ४ सय घर पूर्ण रूपमा ढलेका छन् । साथै १ हजार २ सय २० भन्दा बढी भवनमा क्षति पुगेको छ ।

यस्तै, टर्कीमा तीन महिनाको लागि आपत्काल लागू गरिएको छ । यहाँ सबै स्कुल १३ फेब्रुअरीसम्म बन्द गरिएको छ । सबै सरकारी भवनलाई सेल्टर होम बनाइएको छ । टर्कीका राष्ट्रपति रेचेप तैय्यप अर्दोआनले हालसम्म ७० देश र १४ अन्तर्राष्ट्रिय संगठन मद्दतका लागि अग्रसर भएका छन् ।

टर्कीमा १० हजार कन्टेनरलाई सेल्टर होम बनाउने तयारी गरिएको छ । भुकम्पमा परि ज्यान गुमाउने र घाइतेहरुको उद्धार कार्य चलिरहेको छ । जसकारण मृत्यु हुनेको संख्या अझै बढ्ने अनुमान गरिएको छ ।

यद्यपी टर्कीमा लगातार हिउँ परिरहेको र खराब मौसमका कारण उद्धार कार्यमा निकै चुनौति देखिएको छ ।