काठमाडौं । नेपालका आन्तरिक तर्फको उडान जोखिमपूर्ण रहेको भन्दै उडानमा रोक लगाउन माग गर्दै आइतबार सर्वोच्च अदालतमा रिट निवेदन दर्ता भएको छ ।
पछिल्लो समय हवाई दुर्घटनाका बढीरहेकाले आन्तरिक उडानमा नागरिकहरु विश्वस्त नहुँदासम्म उडान रोक्न माग सहित अधिवक्ता मनीषकुमार श्रेष्ठ र अधिवक्ता कल्पना भाट रिजालले रिट निवेदन दर्ता गराएका हुन् । सर्वोच्चमा दायर भएको रिटमा भनिएको छ, ‘जबसम्म जोखिम कम भयो भनेर विश्वस्त हुन सकिदैन, तवसम्म नेपालमा सञ्चालनमा आएका जहाज कहिले र कहाँ दुर्घटना हुन्छ भनेर सधै त्राहीमाम भएर रहनु पर्ने भएको छ।
यस्तो अवस्थामा नेपालमा आन्तरिक रुपमा उडान भर्ने जति पनि विमानहरु छन्, ती सबै उडान भर्न लायक भएको भनी राष्ट्रिय तथा अन्तर्राष्ट्रियस्तरमा विश्वस्त हुने अवस्था नआएसम्म उडान नभर्नु र भर्न नदिनु भनी सर्वोच्च अदालत नियमावली, २०७४ को नियम ४९ बमोजिम अन्तरिम आदेश जारी गरी पाऊँ। रिट निवेदकहरुले नेपालमा हालसम्म भएका हवाई दुर्घटना र ति दुर्घटनामा ज्यान गुमाउनेहरुको संख्या समेत रिटसंगै पेश गरिएको छ ।
नेपालमा विमान दुघर्टनाका तथ्याङ्क, नेपालका जहाजको अवस्था र उडानको बिषय अन्तराष्ट्रिय रुपमै बदनाम भएको भनाई रिट निवेदकको छ। नेपालमा बारम्बार हवाई दुर्घटना भएपछि अन्तर्राष्ट्रिय नागरिक उड्डयन प्राधिकरण (आइकाओ) र युरोपियन युनियन (इयु) ले कालोसूचिमा राखेको बिषयलाई पनि रिट निवेदमा समेटिएको छ ।
प्रतिक्रिया