सहिदको त्याग र बलिदान गणतन्त्रको प्रतिफलः प्रधानमन्त्री

काठमाडौं । प्रधानमन्त्री पुष्पकमल दाहाल प्रचण्डले सहिदको त्याग र बलिदान गणतन्त्रको प्रतिफल भएको बताएका छन् ।

सोमबार लेनचौरस्थित सहिद स्मृति पार्कमा आयोजित श्रद्धाञ्जली सभालाई सम्बोधन गर्दै प्रधानमन्त्री प्रचण्डले सहिदको त्याग र बलिदानीबाटै मुलुकमा राजनीतिक परिवर्तन आएको बताएका छन् । सहिदहरुको योगदानको स्मरण गर्दै उनले भने– ‘२००७ देखि २०६३ सम्मको संघीय लोकतान्त्रिक गणतन्त्र आउनुमा सहिदको योगदान अतुलनीय छ ।’ उनले देश अनि जनताका निम्ति, प्रगति एवं समृद्धिका लागि आफ्नो प्राण दिनेहरु अमर र अजर रहने बताए ।

साथै राष्ट्र, जनताको प्रगति र सेवामा समर्पित हुन सहिद प्रेरणाको स्रोत बनेको उनको भनाई थियो । १६ माघलाई स्मरण र औपचारिक समारोहमा मात्रै सीमित नभई सहिदको सपना, राष्ट्रको प्रतिष्ठा, जनताको प्रगतिका लागि सबै एक हुनुपर्ने उनले आवश्यकता औंल्याए ।