काठमाडौं । मलेसियाका गृहमन्त्री फुद्दिन नासुसन इजमाइल नेपाल आउने भएको छ ।
गृहमन्त्री फुद्दिनको नेतृत्वमा ११ सदस्यीय उच्चस्तरीय टोली माघ १९ गते नेपाल आउने भएको हो । मलेसियाले तत्काल ५ लाख विदेशी कामदार लैजाने भएपछि नेपालबाट उपलब्ध हुनसक्ने कामदारको अवस्था बुझ्न फुद्दिनको नेतृत्वमा उच्चस्तरीय टोली आउन लागेको बताइएको छ । गृहमन्त्री फुद्दिनले गृहमन्त्रालयको समेत कार्यभार समालेका प्रधानमन्त्री पुष्पकमल दाहाल प्रचण्ड, श्रम, रोजगार तथा सामाजिक सुरक्षामन्त्री डोलप्रसाद अर्यालसँग छुट्टाछुट्टै भेटवार्ता गर्ने तय भइसकेको परराष्ट्र मन्त्रालय स्रोतले जनाएको छ ।
मलेसियाका गृहमन्त्री फुद्दिनले शुक्रबार मलेसियास्थित नेपाली राजदूत डिल्लीप्रसाद पौडेलसँग छलफल गरेका थिए । मलेसियाले औपचारिक क्षेत्रसँग घरेलु कामदारसमेत पठाउन नेपालसँग लबिङ गर्ने योजना बनाएको छ । यसअघि मलेसियाले नेपाललाई लगातार घरेलु कामदार पठाउन आग्रह गर्दै आएको थियो ।
राजदूत पौडेलले यो भ्रमणलाई नेपालले रणनीतिक रुपमा बुझ्नुपर्ने बताएका छन् ।
प्रतिक्रिया