काठमाडौं । उपप्रधान तथा गृहमन्त्री रवि लामिछानेविरुद्धको दोहोरो नागरिकता मुद्दामा सर्वोच्च अदालतले उनले प्रक्रिया पूरा नगरेको ठहर्याएको छ ।
उक्त ठहरसङ्गै ०५० सालकै नागरिकताका आधारमा २ र १ महिने मन्त्री र सांसद पद खेर गएको छ । कायममुकायम प्रधानन्यायाधीश हरिकृष्ण कार्की तथा न्यायाधीशहरु विश्वम्भरप्रसाद श्रेष्ठ,ईश्वरप्रसाद खतिवडा,डा.आनन्दमोहन भट्टराई र अनिलकुमार सिन्हा सम्मिलित संवैधानिक इजलासले अस्ति बुधवार र आज भएको बहसपछि यस्तो आदेश दिएको हो । यसअघि मुद्दाको पक्षमा बहस गर्ने कानुन व्यवसायीहरुले लामिछानेले नेपाली नागरिकता पुनःप्राप्तिको प्रक्रिया नै पूरा नगरेको तर्क गरेका थिए ।
मुद्दाको विपक्षमा रहेका कानुन व्यवसायीहरुको चाहिँ अमेरिकी नागरिकता त्यागेपछि लामिछाने स्वतः नेपाली नागरिक कायम हुने जिकिर थियो । असोजदेखि राष्ट्रिय स्वतन्त्र पार्टीको सभापतिसमेत रहेका लामिछानेले अमेरिकी नागरिकता त्यागेपछि नेपाली नागरिकता लिने प्रक्रिया पूरा नगरेको भन्दै उनको सांसद पद खारेजीको माग दाबीसहित सर्वोच्चमा रिट परेको हो । अमेरिकी नागरिकता लिँदा उनको नेपालको नागरिकता कायम नरहेको र नेपाल फर्केपछि यहाँको नागरिकता लिने प्रक्रिया पूरा नगरेको भन्दै रिट निवेदकहरुले सर्वोच्चमा मुद्दा दायर गरेका हुन् ।
अदालतमा आफूविरुद्ध मुद्दा विचाराधीन रहेको र प्रहरीमा थप अनुसन्धानको प्रक्रिया चलिरहँदा उनी गत पुस ११ गते उपप्रधानसहित गृहमन्त्री बनेका थिए ।
प्रतिक्रिया