काठमाडौं । उपप्रधानमन्त्री तथा गृहमन्त्री रवि लामिछानेले निर्मला कुर्मीको न्यायको माग गर्दै माईतीघरमा धर्ना दिइरहेका बाँकेका महिला अधिकारकर्मीसँग भेट गरेका छन् ।
शनिवार माईतीघर मण्डलामा पुगेर गृहमन्त्री लामिछानेले बाँकेकी निर्मला कुर्मीको घटनाको सत्यतथ्य छानबिन गर्न माग गर्दै आएका अधिकारकर्मीहरुसँग भेट गरेको हुन् । विगत केही दिन यता बाँकेका अधिकारकर्मीहरुको एक टोली माईतीघर मण्डलामा निर्मला कुर्मीको न्यायका लागि धर्नामा छन् ।
यसअघि गृहमन्त्री लामिछानेले अधिकारकर्मीलाई आन्दोलन फिर्ता लिएर अनुसन्धानमा सहयोग गर्न आग्रह गरेका थिए । गृहमन्त्री लामिछानेसँग अधिकारकर्मीहरुले न्याय माग्दै निर्मला कुर्मीलाई न्याय नदिउन्जेलसम्म आन्दोलन जारी राख्ने चेतावनीसमेत दिएका छन् ।
अधिकारकर्मीसँगको भेटमा गृहमन्त्री लामिछानेले निर्मला कुर्मी र नकुन्नी धोबीको घटनाको सत्यतथ्य छानबिन गर्ने प्रतिवद्धता जनाएका छन् । उनले यसअघिका सरकारले पटक–पटक प्रतिवद्धता जनाए पनि उक्त घटनाको छानबिन हुन नसकेको तर आफूले न्याय दिनेकुरामा विश्वस्त रहन आग्रह गरे ।
अधिकारकर्मी रुबी खान नेतृत्वको समूहले ४ बुँदे मागसहित धर्ना दिइरहेका छन् । निर्मला कुर्मी हत्याको घटनामा न्यायिक आयोग गठन गर्नुपर्ने, न्यायिक आयोगमार्फत कुर्मीको तमसुकमा भएको सही छाप चेक गरिनुपर्ने, मुद्दालाई अदालतसम्म पुर्याइनुपर्ने र महिला आन्दोलनकारीको सुरक्षाको प्रत्याभुति गराउनुपर्ने अधिकारकर्मीहरुको माग छ ।
बाँकेकी निर्मला कुर्मी र नन्कुन्नी धोबीलाई न्याय नदिएको अधिकारकर्मीहरुको आरोप छ ।
प्रतिक्रिया