प्रदेश १ का नवनिर्वाचित सांसदहरुको शपथ हुँदै

काठमाडौं । प्रदेश नं. १ का नवनिर्वाचित सांसदहरुको शपथग्रहण सोमबार हुने भएको छ ।

प्रदेश सभा सचिवालयका अनुसार सोमबार दिउँसो साढे १ बजे शपथ ग्रहण कार्यक्रम राखिएको जनाइएको छ । प्रदेश सभाका ज्येष्ठ सदस्य गयानन्द गनगाईंले प्रदेश सभा सदस्यहरुलाई शपथ खुवाउने छन् । त्यसअघि साढे १२ बजे प्रदेश प्रमुख पर्शुराम खापुङले गनगाईंलाई शपथ खुवाउने छन् । त्यसपछि उनले प्रदेश सभाको हलमा अन्य सांसदहरुलाई शपथ खुवाउने कार्यतालिका रहेको छ ।

प्रदेश सभामा पाँच जना सांसदहरुले मातृभाषामा लिने भनेर नाम टिपाएका छन् । मातृभाषामा शपथ लिनेहरुमा इन्द्रबहादुर आङ्बो, खिनु लङवा लिम्बू, कमलप्रसाद जवेगु, खगेनसिं हाङ्गाम र निर्मला लिम्बू रहेको प्रदेश सचिवालयले जनाएको छ ।