कर्णाली प्रदेशसभा सदस्यको शपथ आज हुँदै

सुर्खेत । कर्णाली प्रदेशसभा सदस्यको शपथ ग्रहण सोमबार हुने भएको छ ।

प्रदेश सभाका ज्येष्ठ सदस्यका हैसियतले दैलेखबाट निर्वाचि सांसद विनोदकुमार शाहले नवनिर्वाचित सदस्यहरुलाई शपथ खुवाउने भएका छन् । प्रदेश सभा सदस्य निर्वाचन ऐन, २०७४ को दफा ७५ बमोजिम प्रदेश प्रमुख तिलक परियारले ज्येष्ठ सदस्य विनोद कुमार शाहलाई सोमबार बिहान साढे ११ बजे शपथ ग्रहण गराउने भएका छन् ।

त्यसपछि ज्येष्ठ सदस्य शाहले दिउँसो तीन बजे अन्य सांसदहरुलाई सपथ खुवाउने प्रदेश सभा सचिवालयले जनाएको छ । प्रदेश सभाका कुनै सदस्यले आफ्नो मातृभाषामा शपथ लिन चाहेमा त्यस्तो सदस्यले शपथको आफ्नो मातृभाषामा अनुवाद गरी सो अनुवादको प्रतिसहित प्रदेश सभा सदस्य निर्वाचन ऐन २०७४ को दफा ७५ को उपदफा ९२० बमोजिम तीन दिन अगावै सचिवालयमा उपलब्ध गराउन अनुरोध गरिएको छ ।