नेपाल धितोपत्र बोर्डले प्रधान र न्यौपानेलाई कारबाही गर्ने

काठमाडौं । रिडी पावर कम्पनीका सञ्चालक समितिका अध्यक्ष गुरुप्रसाद न्यौपाने र नेपाल हाइड्रो डेभलपर्स कम्पनीका अध्यक्ष ज्ञानेन्द्रलाल प्रधानलाई नेपाल धितोपत्र बोर्डले कारबाही गर्ने भएको छ ।

हालै बसेको बोर्डको सञ्चालक समितिको बैठकले अवैध रुपमा सेयर कारोबार गरेको ठहर गर्दै न्यौपाने र प्रधानलाई कारबाही गर्ने निर्णय गरेको हो । गैरकानूनी सेयर कारोबार गरेको भन्दै बोर्डको विभागीय स्तरबाट सिफारिस भएपछि सञ्चालक समितिले दुवै जनालाई तपाईंहरूलाई किन हदैसम्मको कारबाही नगर्ने भनेर स्पष्टीकरण सोधेको र चित्तबुझ्दो स्पष्टीकरण नदिए कानुन अनुसार कारबाही हुने बताइएको छ । 

धितोपत्र दर्ता तथा निस्कासन नियमावली २०७९ अनुसार कुनै पनि सूचीकृत संगठित संस्थाको सञ्चालक, कार्यकारी प्रमुख, लेखापरीक्षकको पदमा बहाल रहँदासम्म वा पदबाट अवकाश लिएको एक वर्षसम्म आफ्नो वा आफ्नो परिवार र आफू संलग्न कम्पनीमार्फत् सेयर किनबेच तथा हस्तान्तरण गर्न नपाउने व्यवस्था छ । 

तर, प्रधानले कम्पनीको अध्यक्ष भएको समयमा श्रीमती, छोरा र छोरीको नाममा रहेको ९५ हजारभन्दा बढी कित्ता सेयर ६ करोड रुपैयाँभन्दा बढीमा बिक्री गरेका थिए । जुन गैरकानूनी हो । त्यस्तै, हाइड्रोपावर कम्पनीमा अध्यक्ष रहेकै समयमा न्यौपानेले २०७७ चैत १९ गतेदेखि २०७९ मंसिर २६ गतेसम्म कम्पनीको सेयर किनबेच गरेको पुष्टि भएको छ ।