मृतक १८ मध्ये १३ जनाको पहिचान खुल्यो

काभ्रे । काभ्रेको बेथानचोक गाउँपालिका–४ मा भएको बस दुर्घटनामा ज्यान गुमाउने १८ जना मध्य १३ जनाको पहिचान खुलेको छ ।

जिल्ला प्रहरी कार्यालय काभ्रेका अनुसार मृत्यु हुनेहरुमा ७ जना एउटै वडाका रहेका छन् । मृतक ७९ वर्षीया निर्मला तामाङ, ११ वर्षीय योगेश तामाङ, ५० वर्षीय अंकुर तामाङ, ४३ वर्षीया हेमा तामाङ, १० वर्षीय पुष्कर तामाङ, २५ वर्षीया कोपिला तामाङ, ६ वर्षीया श्रेया तामाङ बनेपा नगरपालिका वडा नं ११ का रहेका छन् ।

अन्य मृत्यु हुनेमा बनेपा १४ का ३९ वर्षीय राजकुमार तामाङ, २८ वर्षीया गीता श्रेष्ठ, मण्डनदेउपुर नगरपालिका–१ का ३७ वर्षीया जेली तामाङ, धुलिखेल–११ का ३० वर्षीय बुद्ध तामाङ, बेथानचोक– ५ का ३२ वर्षीय मञ्जु तामाङ छन् । बस चालक ललितपुर महांकाल–४ घर भई हाल पनौती–४ बस्ने २२ वर्षीय सन्तोष तिमल्सिनाको समेत मृत्यु भएको छ ।

मृतकमध्ये ५ जनाको अझै पनि पहिचान खुल्न नसकेको प्रहरीले जनाएको छ । बनेपा नगरपालिका–११ बाट ब्रतबन्धका लागि बेथानचोक गाउँपालिका–५, च्याल्टी पुगेर फर्किँदै गरेको बा३ख ४३८५ नम्बरको रिजर्भ बस मंगलबार राति दुर्घटना भएको थियो । उक्त बसमा ३९ जना यात्रु सवार रहेका थिए ।

दुर्घटनामा घाइते अन्य २२ जनाको धुलिखेल अस्पताल, बनेपाको शिर ममोरियल अस्पताल, मध्यपुर थिमि अस्पताल, वीर अस्पताल, न्यूरो असपताल बाँसबारीमा उपचार भइरहेको छ।