यु–१९ः वागमतीको लगातार चौथो जित

काठमाडौं । कर्णाली प्रदेशमाथि ७ विकेटको जित निकालेको वागमती प्रदेशले राजधानीमा जारी वाई वाई यु–१९ पुरुष राष्ट्रिय क्रिकेट प्रतियोगितामा लगातार चौथो जित निकालेको छ ।

कीर्तिपुरस्थित त्रिभुवन विश्व विद्यालयको मैदानमा मंगलवार सम्पन्न खेलमा कर्णाली प्रदेशले ३६ दशमलब २ ओभरमा सबै विकेट गुमाएर दिएको १ सय ३१ रनको लक्ष्य वागमती प्रदेशले ३ विकेटको क्षतिमा पूरा गरेको हो । यससँगै वागमतीले जारी प्रतियोगितामा अपराजित यात्रालाई चौथो खेलमा पनि निरन्तरता दिएको छ । यस्तै सुदूरपश्चिम प्रदेशले पनि चार वटै खेलमा सुखद् नतिजा निकालेको थियो ।

मध्यम लक्ष्य पछ्याएको वागमतीका लागि लुक्की कठायतले अर्धशतकीय पारी खेले । ८ चौका प्रहार गर्दा उनी ५१ रनमा अविजित रहे । यस्तै ६४ बलको सामना गरेका अशोक पोडेलले ७ चौका र १ छक्का हानेका थिए । अन्य ब्याट्सम्यानले भने दोहोरो अंकको स्कोर गर्न सकेनन् । बलिङतर्फ कर्णालीका अनुज चनारा, युनिस सिंह र आवास साहले समान १÷१ लिए । यसअघि टस जितेर पहिले ब्याटिङ गरेको कर्णालीका लागि कप्तान विपिन रावलले अर्धशतकीय पारी खेले ।

उनले ९२ बल खेल्दा ९ चौकाको सहयोगमा व्यक्तिगत ६८ रनको योगदान गरेका थिए । यस्तै अर्का ओपनर मनिस थापाले २५ रन जोड्दा अनिरुद्ध कावरले ११ रन जोडे भने अन्य ब्याट्सम्यानले दोहोरो अंकको पारी खेल्न सकेनन् । बलिङतर्फ ७ दशमलब २ ओभर बलिङ गरेका सक्रिय कार्कीले २ मेडन राख्दै २३ रन खर्चिएर सर्वाधिक ५ विकेट निकाले । अहम्मद राजाले ३ विकेट हात पार्दा ओमकार यादव र अभिषेक कोईरालाले १÷१ विकेट आफ्नो नाममा लेखाए ।

यस जितसँगै वागमतीले ४ खेलबाट ८ अंक जोडेको छ । कर्णालको समान चार खेलबाट २ अंक मात्र छ । सुदूरपश्चिमसँग समान ८ अंक बनाएको वागमती तालिकाको दोस्रो स्थानमा छ । प्रतियोगिता अन्तर्गत मुलपानी मैदानमा सम्पन्न खेलमा मधेस प्रदेशले दिएको ७१ रनको लक्ष्य प्रदेश नम्बर १ ले १९ दशमलब २ ओभरमा बिना विकेटको क्षतिमा भेट्टायो । प्रदेश १ का लागि सोनी अन्सरीले ४५ र शुभन गहतराजले २४ रनको अविजित पारी खेले ।

ओसिलो मैदानका कारण ४५ ओभरमा घटाएको खेलमा टस जितेर पहिले ब्याटिङ गरेको मधेस प्रदेशले ३१ दशमलब ३ ओभरमा सबै विकेट गुमाएर मात्रै ७० रन जोडेको थियो । ओपनर मयन यादवले १९, दाब्लु मलिकले १२ रन जोड्नु बाहेक अन्य ब्ट्सम्यानले दोहोरो अंकको स्कोर गर्न सकेनन् । कसिलो बलिङ गरेको प्रदेश १ का लागि दिपेश कंडेलले र विपिन महतोले समान ३÷३ विकेट लिए भने सन्देश भट्टराईको नाममा दुई विकेट रह्यो ।

अश्विन महतो र आशिष मगरले १÷१ विकेट हात पारे । यससँगै प्रदेश नम्बर १ चार खेलबाट दोस्रो जित निकाल्दै तालिकामा ४ अंक बनाएको छ भने फराकिलो नतिजा सुम्पिएको मधेस प्रदेशको यो लगातार तेस्रो हार हो । प्रतियोगितामा बुधवार पनि दुई खेल हुनेछन् ।

कीर्तिपुर मैदानमा लुम्बिनी प्रदेशले प्रदेश १ सँग प्रतिष्पर्धा गर्दा मुलपानीमा गण्डकी र कर्णाली प्रदेशबीच प्रतिष्पर्धा हुनेछ ।