दैलेख । नेकपा एमालेका अध्यक्ष केपी शर्मा ओलीले प्रतिनिधिसभा विघटन उचित कदम भएको जिकिर गरेका छन् ।
आईतबार कालिकोटमा आयोजित चुनावी सभालाई सम्बोधन गर्दै अध्यक्ष ओलीले नेकपा माओवादी केन्द्रका अध्यक्ष पूष्पकमल दाहालले चुनावमा गरेका प्रतिबद्धताअनुसार काम गर्न नदिएका कारण प्रतिनिधिसभा विघटन गर्नुपरेको दाबी गरे । उनले नेपाली कांग्रेसका सभापति तथा प्रधानमन्त्री शेरबहादुर देउवा र माओवादी अध्यक्ष दाहाल दुवैलाई प्रतिगमनकारीको संज्ञा दिए ।
आफू सचिवालय, स्थायी कमिटी, पोलिटब्युरो, केन्द्रीय कमिटीमा अल्पमतमा पर्ने जान्दा जान्दै पनि वामपन्थी शक्तिलाई एकै स्थानमा ल्याउने ठुलो प्रयास गरेको ओलीको दाबी थियो । अदालतमा सेटिङ गरेर विकासको काम तीव्र बनाएको आफ्नो सरकारलाई हटाइएको उनको आरोप छ ।
त्यस्तै आईतबार नै दैलेखमा अयोजना भएको चुनावी सभामा अध्यक्ष ओलीले प्रधानमन्त्री देउवालाई हत्याराको आरोप लगाएका छन् । देउवा गृहमन्त्री हुँदा १ सय २२ जना सर्वसाधारणलाई गोली हानी हत्या गरेको उनको जिकिर छ । अध्यक्ष ओलीले नेकपा एमाले जनतामा आतङ्क मच्चाउने पार्टी नभई देशमा विकाश र समृद्धि ल्याउने पार्टी रहेको बताए ।
एमाले देशको स्वाधीन अर्थतन्त्रको लागि बनेको पार्टी भएको उनले दाबी गरेका छन् ।
प्रतिक्रिया