स्वतन्त्र उम्मेदवारहरु विकल्प दिने औकातसहित आएनन् : अधिवक्ता अर्याल

काठमाडौं । अधिवक्ता ओमप्रकाश अर्यालले पार्टीभित्र उम्मेदवार छनोट गर्दा ‘प्राइमरी इलेक्शन’को व्यवस्था हुनुपर्ने बताएका छन् ।

निर्वाचन पर्यवेक्षण समिति नेपालले मंगलवार काठमाडौंमा आयोजना गरेको ‘समसामयिक राजनीतिक परिप्रेक्ष्यमा हाम्रो निर्वाचन पद्धति र शासकीय प्रवन्ध’ विषयक अन्तरक्रियामा बोल्दै अधिवक्ता अर्यालले उम्मेदवार छनोट गर्दा पार्टी भित्र ‘प्राइमरी इलेक्शन’ गर्ने व्यवस्था हुनुपर्ने बताएका हुन् ।

उनले दलहरुलाई ‘प्राइमरी इलेक्शन’ का लागि निर्वाचन आयोगले निर्देशन नै दिनुपर्ने बताए । यस्तो व्यवस्थाले संविधान र कानून नमिचिने उनले उल्लेख गरे । आयोगले पार्टीले यस्तो नगर खण्डमा पार्टीको नेतृत्वलाई दण्डित गर्न सकेमा यो व्यवस्था लागू हुने उनले बताए । अधिवक्ता अर्यालले निर्वाचन आयोग स्वतन्त्र हुन नसकेको बताए । आयोगले कतिपय निर्णयहरु दलका ठूला नेताहरुलाई हेरेर गर्ने गरेको आरोप समेत लगाए ।

उनले समानुपातिक निर्वाचनको टिकट पैसा हुनेलाई मात्रै दिने गरिएको बताए । उनले स्वतन्त्र उम्मेदवारहरु पानीको फोकाजस्तै भएको भन्दै उनिहरु निर्वाचनमा होमिएपनि विकल्प दिने औकातसहित नआएका बताए । । साना पार्टीहरु पनि अन्ततः अवसानतिर जानसक्ने उनको भनाई छ । लक्ष्यविहीन स्वतन्त्रहरु बढी भएमा लोकतन्त्र, निर्वाचन प्रणाली र स्थिरतालाई असर पार्ने उनले बताए ।

उनले निर्वाचन आयोगले तोकेको खर्च सीमा लागू हुन नसकेको बताउदै खर्चिलो निर्वाचन प्रणालीका कारण पैसावाला मात्रै प्रत्यक्ष राजनीतिमा संलग्न हुने अवस्था आएको धारणा राखे ।