डडेल्धुरा । भूकम्पले घर भत्किँदा डोटीमा ६ जनाको मृत्यु भएको छ ।
गए रातिको भूकम्पले घर भत्किँदा पूर्वीचौकी गाउँपालिका–३ को ठाडा गाउँका ६ जनाको मृत्यु भएको प्रहरीले जनाएको छ । मृत्यु हुनेमा ठाडा गाउँकी ३८ वर्षीया भगवती बोहरा, उनकी १३ वर्षीया छोरी सीता र सात वर्षीय छोरा हर्क रहेको जिल्ला प्रहरी कार्यालय डोटी जानकएको छ । यस्तै ४५ वर्षीय प्रेम बोहरा, उनकी १२ वर्षीया छोरी तुलसी र राति बोहराकै घरमा सुतेकी स्थानीय महाविर बोहराकी १७ वर्षीया छोरी धनसरीको पनि मृत्यु भएको छ ।
भूकम्पले घर भत्काउँदा सोही वडाका ४५ वर्षीय महाविर बोहरा, ४० वर्षीय इन्नरी बोहरा, ४५ वर्षीया विष्णादेवी बोहरा, ४६ वर्षीय चनादेवी बोहरा र ११ वर्षीया धौली बोहरा घाइते भएका र उनीहरूको स्थानीय स्वास्थ्य चौकीमा उपचार भइरहेको छ ।
भूकम्पले जिल्लाका अन्य स्थानमा समेत भौतिक क्षति भए पनि मानवीय क्षतिको विवरण प्राप्त नभएको प्रहरीले जनाएको छ । मंगलबार राति ९ बजेर ७ मिनेटमा डोटीको खप्तड राष्ट्रिय निकुञ्ज केन्द्रबिन्दु बनाएर ५ दशमलव ७ म्याग्निच्युडको भूकम्प गएको थियो ।
त्यसैगरी राति २ बजेर १२ मिनेटमा खप्तड राष्ट्रिय निकुञ्ज नै केन्द्रबिन्दु बनाएर ६ दशमलव ६ म्याग्निच्युडको भूकम्प गएको थियो । भूकम्पको धक्का सुदूरपश्चिम प्रदेशसहित कर्णाली प्रदेशका केही जिल्लामा समेत महसुस गरिएको थियो । राष्ट्रिय भूकम्प मापन तथा अनुसन्धान केन्द्रले यो गोरखा भूकम्पको परकम्प नभई नयाँ भूकम्प भएको जनाएको छ ।
प्रतिक्रिया