कास्की । नवौं राष्ट्रिय खेलकुद अन्तर्गत एथलेटिक्स ५ हजार मिटर दौड पुरुषमा विभागीय टोली एपिएफका गोपीचन्द्र पार्कीले बिहीवार स्वर्ण पदक जितेका छन् ।
पोखरा रंगशालाको ट्रयाकमा भएको अन्तिम दिनको खेलमा पार्कीले निर्धारित दूरी १४ मिनेट २९ दशमलव ६७ सेकेन्डमा पूरा गर्दै स्वर्ण पदक जितेका हुन् । यसअघि १० हजार मिटर दौडमा गोपीचन्द्रले रजत पदक जितेका थिए । ५ हजार मिटरमा कर्णालीका दुर्गाबहादुर बुढाले १४ मिनेट २९ दशमलव ९३ सेकेन्डमा पूरा गर्दै रजत पदक आफ्नो पोल्टामा पार्दा त्रिभुवन आर्मी क्लवका मुकेश पालले निर्धारित दूरी १४ मिनेट ३६ दशमलव ६० सेकेन्डमा पूरा गर्दै कास्य पदकमा चित्त बुझाए ।
एथ्लेटिक्स २ सय मिटर दौडमा पुरुषतर्फ एपीएफका शिवराज पार्की र महिलातर्फ लुम्बिनी प्रदेशकी निशा चौधरीले स्वर्ण पदक जितेका छन् । पोखरा रंगशालामा बिहीवार पुरुषतर्फ शिवराजले निर्धारित दूरी २१ दशमलव९१ सेकेन्डमा पूरा गर्दै स्वर्ण जितेका हुन् ।
एपिएफकै आशिष चौधरीले २२ दशमलव ०५ सेकेन्डमा निर्धारित दूरी पूरा गर्दै रजत पदक जिते । त्रिभूवन आर्मी क्लवका युवराज बिकले २२ दशमलव ५० सेकेन्डमा पूरा गर्दै कास्य पदक जिते ।
प्रतिक्रिया