काठमाडौं । माध्यामिक तहमा अध्ययनरत विद्यार्थीहरुले एकपटक मात्रै रजिष्ट्रेसन फाराम भरे पुग्ने भएको छ ।
माध्यामिक तहको लागि फाराम ९ कक्षामा भरेपछि उक्त रजिष्ट्रेसन नम्बर कक्षा १२ सम्म लागू हुनेगरी प्राविधिक अध्ययन भइरहेको राष्ट्रिय परिक्षा बोर्डले जनाएको छ । कक्षा ९ देखि १२ सम्मलाई माध्यामिक तह मानिए पनि फारम भने पटक पटक भर्नुपर्ने बाध्यता बाट विद्यार्थीहरुलाई छुट्कारा दिलाउन बोर्डले यो प्रक्रिया अघि बढाएको हो ।
यो वर्ष कक्षा ९ मा अध्ययन गर्ने विद्यार्थीहरुदेखि लागू हुनेगरी कक्षा ९ मा फाराम भरे त्यही रजिष्ट्रेसन नम्बर १२ कक्षा सम्मै रहेन गरी होमवर्क गरिरहेको बोर्डले जनाएको छ । यसभन्दा अघि कक्षा ९ र कक्षा ११ मा दोहोरो रजिष्ट्रेसन फाराम भर्नुपर्ने भएकाले बोर्डले गत साता कार्यतालिका सार्वजनिक गर्दै कक्षा ११ का विद्यार्थीले कात्तिक मसान्तसम्म रजिष्ट्रेसन फाराम भर्ने समयावधि तोकेको छ ।
सामान्यतया असोज–कात्तिक महिनामा कक्षा ९ को रजिष्ट्रेसन फाराम भराउने गरिए पनि यो वर्ष माध्यामिक तहलाई एक पटक मात्रै रजिष्ट्रेसन भराउने गरी कार्य भईरहेकाले उक्त कार्य सकिएपछि निर्णय सहित रजिष्ट्रेसन समयावधि तोक्ने तयारि बोर्डको छ । बोर्डले विद्यालयको कोड नम्बर एउटै कायम गर्ने गरी काम भइरहेको जनाएको छ ।
हाल शिक्षा तथा मानव स्रोत विकास केन्द्रले एउटा कोड तथा कक्षा १० र १२ का परीक्षा नियन्त्रण कार्यालयले फरक कोड निर्धारण गर्दै आएका छन् ।
प्रतिक्रिया