काठमाडौं । सत्ता गठबन्धनको तर्फबाट काठमाडौँ निर्वाचन क्षेत्र १ बाट प्रतिनिधिसभा सदस्यमा उम्मेदवारी दिएका कांग्रेस नेता प्रकाशमान सिंहले चुनावी प्रतिबद्धतापत्र सार्वजनिक गर्दै कार्तिक १ गतेदेखि चुनावी अभियान सुरु गर्ने जानकारी दिएका छन् ।
सोमबार क्षेत्र नं १ अन्तर्गतको प्रदेश तथा समानुपातिक उम्मेदवार सहभागी पत्रकार सम्मेलनमा नेता सिंहले आफ्नो उम्मेदवारी जनताको चाहनाकै कारण भएको बताए । ‘केन्द्रमा प्रभाव, क्षेत्रमा विकास’ नारा लिएर चौथोपटक मतदातासमक्ष आएका सिंहले विश्वमै मतदाताले रुचाएसम्म उम्मेदवार दिने प्रचलन रहेको बताए ।
उनले चुनिएपछि जनताले दिएको म्याण्डेटलाई इमान्दारीपूर्वक निर्वाह गर्ने प्रतिबद्धता समेत व्यक्त गरेका छन् । नेता सिंहले मुलुकमा संघियता दिलाउन, प्रदेश र स्थानीय तहको सुनिश्चित गर्ने लगायतको काममा आफ्नो सक्रिय सहभागिता रहने जानकारी दिए ।
उनले शिक्षामा सुधार ल्याउँदै प्राविधिक शिक्षामा जोड दिने बताए ।
प्रतिक्रिया