भारतमा पुल चुडिंदा १४१ जनाको मृत्यु, मर्मत गर्ने निकाय विरुद्ध फौजदारी मुद्दा दर्ता

एजेन्सी । भारतको गुजरातमा पुल चुडिंदा १४१ जनाको मृत्यु भएको छ ।

आइतबार साँझ मोरबी भन्ने स्थानमा पर्ने मच्छु नदीमाथि बनेको पुल चुडिंदा १३७ जनाको मृत्यु भएको छ भने १०० जना भन्दा घाईते भएको भारतीय मिडियाहरुले उल्लेख गरेका छन् । समाचार अनुसार अझै ५० जना भन्दा बढी सम्पर्कबिहिन रहेका छन् । सुरक्षाकर्मीहरुले खोज तथा उद्धारको काम जारी राखेका छन् ।

भारतीय वायु सेनाका जवानहरुलाई पनि घटनास्थलमा परिचालन गरिएको छ । गुजरातका मुख्यमन्त्री भुपेन्द्र पटेलले अस्पताल पुगेर घाइतेहरुसँग भेटघाट गरेका छन् । उनले समीक्षा बैठक बोलाएर घटनाको अनुसन्धानका लागि पाँच सदस्यीय समिति गठन गरेका छन् । राष्ट्रपति द्रौपदी मुर्मु र प्रधानमन्त्री नरेन्द्र मोदी लगायतले घटनाप्रति दुःख व्यक्त गरेका छन् ।

मोरबी पुल हालैमात्रै मर्मत गरिएको थियो । उक्त पुलमा चढ्नका लागि भारु १७ रुपैयाँ शुल्क लिइन्थ्यो । आइतबार साँझ उक्त पुलमा क्षमताभन्दा बढी मानिसहरु रहेकाले पुल चुडिएको अनुमान गरिएको छ । स्थानीयका अनुसार पुल चुडिने बेला त्यहाँ करिब ४०० जना मानिसहरु रहेको अनुमान छ ।

मोरबी दुर्घटनाका सम्बन्धमा मर्मत सम्भार गर्ने निकायविरुद्ध ३०४, ३०८ र ११४ अन्तर्गत फौजदारी मुद्दा दर्ता गरी अनुसन्धान सुरु गरिएको छ ।