गोरखा । नेपाल समाजवादी पार्टीका अध्यक्ष डा. बाबुराम भट्टराईले मंसिर–४ को निर्वाचनपछि नेकपा माओवादी केन्द्रका अध्यक्ष पुष्पकमल दाहाल प्रधानमन्त्री बन्ने ठोकुवा गरेका छन् ।
गोरखाको सिरानचोक गाउँपालिकाको चित्रेपोखरीमा मतदाता भेटघाट कार्यक्रममा अध्यक्ष दाहालसहित पुगेका भट्टराईले माओवादी अध्यक्ष दाहाल प्रधानमन्त्री बन्ने बताए । गठबन्धनको सरकार पाँच वर्ष चल्ने भन्दै उनले दाहाल दुई पटक प्रधानमन्त्री बनेको सुयोग्य व्यक्ति भएको जिकिर गरे । दाहाल जस्तो चलायमान र लोकप्रिय नेता अरु कोही नभएको उनको भनाइ थियो ।
भट्टराईले नेपाली काँग्रेसका प्रदेश सभातर्फका उम्मेदवार सुरेन्द्र पाण्डे गण्डकीको मुख्यमन्त्री बन्ने जिकिर गरे । गोरखा क्षेत्र नम्बर २ ले भावी प्रधानमन्त्री र मुख्यमन्त्री दुवै पाउन लागेको भन्दै भट्टराईले अब यो क्षेत्रको चमत्कारिक विकास हुने तर्क गरे । भट्टराईले गठबन्धनका साझा उम्मेदवारलाई विजयी गराउन मतदाता र कार्यकर्तालाई अपिल समेत गरेका छन् ।
प्रतिक्रिया