काठमाडौं । साहित्यसुधा नेपालका उपाध्यक्ष तथा प्रगतिशील लेखक सङ्घ, भक्तपुरका अध्यक्ष साहित्यकार गणेश घिमिरे ‘मार्मिक’ कृत महाकाव्य ‘श्रीधरा’ सार्वजनिक भएको छ ।
प्रमुख अतिथि प्रा.डा.माधवप्रसाद पोखरेलका साथ वरिष्ठ समालोचक डा.रामप्रसाद ज्ञवाली, विशिष्ट अतिथि साहित्यकार गोविन्दप्रसाद कुसुम लगायत विशिष्ट व्यक्तित्वहरूबाट महाकाव्य श्रीधराको विमोचन गरिएको हो । साहित्यसुधा नेपालकी अध्यक्ष कल्पना काफ्लेको अध्यक्षतामा सम्पन्न उक्त कार्यक्रमको संचालन सोही संस्थाका सह–सचिव कृष्णदेव रिमालले गरेका थिए भने सदस्य राजेन्द्र घिमिरेले स्वागत मन्तव्य प्रस्तुत गरेका थिए ।
शुभकामना मन्तव्य दिनेहरुमा नेपाल सरकारका पूर्व सचिव तथा लोकसेवा आयोगका पूर्व सदस्य साहित्यकार गोविन्द कुसुम तथा साहित्यसुधा नेपालका सल्लाहकार कवि कलानीधि दाहाल समेत थिए । कार्यक्रममा कवि सुशिला शर्मा धमला, पूजन मिश्र, सविता बराल तथा इन्दिरा दाहालले श्रीधरा महाकाव्यबाट केही काव्यांश पाठ गरेर कार्यक्रममा रोचकता थपेका थिए । स्रष्टा परिचय, समीक्षा तथा शुभकामनाका क्रममा बक्ताहरुले महाकाव्यकार मार्मिकको शालीन व्यक्तित्व, मिहिनेत, काव्यक्षमता, काव्यशिल्प, शब्द संयोजन कला र विषयगाम्भीर्यको चर्चा गर्दै महाकाव्यको उत्कृष्ठताको मुक्तकण्ठले प्रशंसा गरेका थिए ।
कुल ३५ वटा छन्दमा लेखिएको श्रीधरा महाकाव्यमा सिङ्गो नेपाल राष्ट्रको चित्र उतारिएको चर्चा पनि गरियो । महाकाव्यकार मार्मिकले यस महाकाव्यमा दिवङ्गत साहित्यकार वसन्तकुमार शर्माको आशीर्वाद मिसिएको चर्चा सहित आफ्ना केही कुराहरु राख्दै सम्बद्घ सबैलाई धन्यवाद समेत ज्ञापन गरे ।
प्रतिक्रिया