काठमाडौं । राजनीतिक दलहरुले निर्वाचन आयोगमा पेश गरेको समानुपातिकतर्फको संशोधित बन्दसूचीमा सुचीकृत २९ जना उम्मेदवारले नाम फिर्ताको लागि आयोगमा निवेदन दिएका छन् ।
आगामी मंसिर ४ गते हुने प्रतिनिधिसभा र प्रदेशसभाको निर्वाचनको लागि समानुपातिक बन्दसूचीबाट प्रतिनिधिसभा सदस्यतर्फ ९ र प्रदेशसभातर्फ २० जना उम्मेदवारले उम्मेदवारी फिर्ता लिन निवेदन दिएको निर्वाचन आयोगले जनाएको छ । निर्वाचन आयोगका अनुसार प्रतिनिधिसभातर्फ नेपाली कांग्रेस ४, जनता समाजवादी पार्टी ३, नेकपा माओवादी केन्द्र १ र नेकपा एकीकृत समाजवादीबाट १ जना उम्मेदवारले उम्मेदवारी फिर्ता लिएका छन् ।
यसैगरी प्रदेशसभातर्फ प्रदेश–१ का ६, मधेश २, बागमती १०, गण्डकी र लुम्बिनीका १–१ जनाले उम्मेदवारी फिर्ता लिएका छन् । आयोगले उम्मेदवारी फिर्ताको लागि सोमबार बिहान १० देखि मध्यान्ह १२ बजेसम्म समय दिएको थियो ।
प्रतिपक्षी नेकपा एमालेबाट परेको सूचीबाट नाम फिर्ता लिने कोही नभएको निर्वाचन आयोगले जनाएको छ ।
प्रतिक्रिया