आजको मौसमः काठमाडौं सहित अधिकांश ठाउँमा भारी बर्षा, सतर्क रहन आग्रह

काठमाडौं । मौसम पूर्वानुमान महाशाखाका अनुसार हाल देशभर बङ्गालको खाडीबाट आएको जलवाष्पयुक्त मनसुनी वायुको प्रभाव देखिएको छ।

यसकै कारण विभिन्न प्रदेशमा मौसम बदलिँदो र वर्षा भइरहेका छन्। हाल कोशी, बागमती, गण्डकी र लुम्बिनी प्रदेशका थोरै स्थानहरूमा हल्कादेखि मध्यम वर्षा भइरहेको छ भने आज दिउँसो देशभर सामान्यतया बदली रहने पूर्वानुमान गरिएको छ। विशेषगरी कोशी, मधेस, बागमती, गण्डकी र लुम्बिनी प्रदेशका पहाडी तथा तराई भूभागका धेरै स्थानमा चट्याङसहित मध्यम वर्षा हुने सम्भावना छ। बाँकी प्रदेशका केही पहाडी तथा तराई क्षेत्रहरूमा पनि वर्षा हुने देखिएको छ।

यस्तै, कोशी, मधेस, बागमती र गण्डकी प्रदेशका पहाडी–तराई भूभागका थोरै स्थानहरूमा तथा लुम्बिनी प्रदेशका तराई भूभागका एक–दुई स्थानमा भारी वर्षा हुनसक्नेछ। मधेस, बागमती र गण्डकी प्रदेशका पहाडी तथा तराई क्षेत्रमा भने धेरै भारी वर्षाको जोखिम रहेको महाशाखाले चेतावनी दिएको छ।

आज राति पनि कोशी, मधेस, बागमती र गण्डकी प्रदेशमा अधिकांश ठाउँमा बदली रहनेछ। ती प्रदेशका पहाडी–तराई भूभागका धेरै स्थानमा र लुम्बिनी प्रदेशका विभिन्न क्षेत्रमा चट्याङसहित वर्षा हुने अनुमान गरिएको छ। साथै, केही स्थानहरूमा भारीदेखि धेरै भारी वर्षा समेत हुनसक्ने भएकाले महाशाखाले उच्च सतर्कता अपनाउन सबैलाई आग्रह गरेको छ।