फिफा क्लब विश्वकप: पेड्रोको दुई गोल, चेल्सी फाइनलमा

एजेन्सी । यस सिजन चेल्सीमा भर्खरै अनुबन्धित ब्राजिलियन युवा खेलाडी जोओ पेड्रोको उत्कृष्ट प्रदर्शनसँगै चेल्सीले फ्लुमिनेन्समाथि २–० को जित निकाल्दै फिफा क्लब विश्वकपको फाइनलमा स्थान सुरक्षित गरेको छ।

अमेरिकाको मेटलाइफ स्टेडियममा सम्पन्न खेलमा पेड्रोले खेलको १८औं र ५६औं मिनेटमा गोल गर्दै चेल्सीलाई जित दिलाए। फ्लुमिनेन्सले पनि केही सम्भावना बनाएको भए पनि गोल गर्न असफल रह्यो। उल्लेखनीय कुरा के हो भने, पेड्रो अघिल्लो सिजन ब्राइटनमा थिए र यसै सिजन चेल्सी आएका हुन्।

अझ रोचक कुरा त, उनले यसअघि फ्लुमिनेन्समै खेलेका थिए, त्यसैले गोल गरे पनि उनले उत्सव मनाएनन्। चेल्सीको लागि यो उनको मात्र दोस्रो खेल हो, तर उनले आफ्नो प्रभावशाली सुरुवात गरेका छन्। अब चेल्सीले फाइनलमा रियल मड्रिड र पेरिस सेन्ट जर्मेन (पीएसजी)बीचको विजेतासँग उपाधिका लागि भिडन्त गर्नेछ।

रियल र पीएसजीबीचको खेल आज राति हुँदैछ।