एयर इण्डियाको विमान दुर्घटना: कुनै पनि नेपाली नागरिक सवार नरहेको पुष्टि

काठमाडौं । लण्डनतर्फ उडान भरिरहेको एयर इण्डियाको विमान दुर्घटनामा परेको छ, तर त्यसमा कुनै पनि नेपाली नागरिक नदेखिएको पुष्टि भएको छ।

२ सय ४२ जना यात्रु सवार उक्त विमानमा नेपाली नागरिक हुन सक्ने आशंकामा दिल्लीस्थित नेपाली दूतावासले भारतीय अधिकारीहरूसँग समन्वय गरेको थियो। दूतावासका कन्सुलर सञ्जीव शर्माले भारतीय पक्षले पठाएको यात्रु विवरणको अध्ययनपछि कुनै पनि नेपाली नागरिक सवार नभएको पुष्टि भएको जानकारी दिए।

शर्माका अनुसार विमानमा रहेका यात्रुहरू मुख्यतः भारतीय, बेलायती, क्यानाडियन र पोर्चुगिज नागरिक थिए। एयर इण्डियाको बोइङ ७८७-८ ड्रीमलाइनर विमान अहमदाबाद विमानस्थलबाट उडान भरेको केही मिनेटमै दुर्घटनाग्रस्त भएको हो। दुर्घटनाको कारण भने हालसम्म खुल्न सकेको छैन।

दुर्घटनामा मानवीय क्षति वा अन्य विस्तृत विवरणहरू सार्वजनिक भइसकेका छैनन्। एयर इण्डियाले घटना सम्बन्धमा अनुसन्धान अघि बढाएको जनाइएको छ।