काठमाडौं । इन्डियन प्रिमियर लिग (आईपीएल) मा पञ्जाव किङ्सले कप्तान श्रेयस अय्यरको धुवाँधार प्रदर्शनको भरमा मुम्बई इन्डियन्सलाई पराजित गर्दै ११ वर्षपछि पहिलो पटक फाइनलमा स्थान सुरक्षित गरेको छ।
आइतबार सम्पन्न दोस्रो क्वालिफायर खेलमा पाँच पटकको च्याम्पियन मुम्बई इन्डियन्सलाई पञ्जावले ५ विकेटले पराजित गर्दै उपाधि नजिक पुगेको हो। दोस्रो इनिङमा २०४ रनको ठूलो लक्ष्य पछ्याएको पञ्जावले १९ ओभरमै ५ विकेटको क्षतिमा लक्ष्य भेट्टायो। कप्तान अय्यरले ४१ बलमा अविजित ८७ रन प्रहार गरे, जसमा ५ चौका र ८ छक्का समावेश थिए।
उनले टोलीलाई संकटको अवस्थामा सम्हाल्दै जितको गोरेटो देखाए। साथमा, नेहाल वधेराले ४८ र जोश इङ्लिसले ३८ रनको उपयोगी योगदान दिए। मुम्बईका बलरमध्ये अश्वनी कुमारले २ विकेट लिँदा, ट्रेन्ट बोल्ट र कप्तान हार्दिक पाण्ड्याले १–१ विकेट लिए। यसअघि टस हारेर पहिला ब्याटिङ गरेको मुम्बईले ६ विकेटको क्षतिमा २०३ रन बनाएको थियो। तिलक वर्मा र सूर्यकुमार यादवले समान ४४–४४ रन बनाए भने नमन धिरले ३७ रन जोडे।
पञ्जावका लागि अजमतुल्लाह ओमरजाइले २ विकेट हात पारे भने काइल जेमिसन, मार्कस स्टोइनिस, विजयकुमार वाइशाक र युजभेन्द्र चहलले समान १–१ विकेट लिए। यो जितसँगै सन् २०१४ पछि पहिलो पटक पञ्जाव किङ्स आईपीएलको फाइनलमा प्रवेश गर्न सफल भएको हो। २०१४ मा पनि पञ्जाव फाइनलमा पुगेको थियो तर उपाधि भने कोलकाता नाइट राइडर्ससँग गुमाएको थियो।
अब पञ्जाव उपाधिका लागि मङ्गलबार रोयल च्यालेन्जर्स बेंगलुरुसँग भिड्नेछ।
प्रतिक्रिया