आजको मौसमः यी प्रदेशमा चट्याङसहित वर्षाको सम्भावना

काठमाडौं । अहिले देशभरको मौसममा पश्चिमी वायु, स्थानीय वायुसँगै बङ्गालको खाडीबाट आएको जलवाष्पयुक्त हावाको आंशिक प्रभाव देखिएको छ।

मौसम पूर्वानुमान महाशाखाका अनुसार यस प्रभावले गर्दा विशेषगरी पहाडी क्षेत्रहरूमा आंशिकदेखि सामान्य बदलीको अवस्था रहँदा तराईका अन्य भूभागमा मौसम प्रायः सफा वा हल्का बदली रहेको छ। गण्डकी र लुम्बिनी प्रदेशका केही स्थानहरूमा अहिले चट्याङसहित हल्का वर्षा भइरहेको जनाइएको छ।

हाल मनसुन अरब सागरको मध्य भाग, महाराष्ट्र, मुम्बई, कर्नाटक, बाङ्गलोर, तमिलनाडुको बाँकी क्षेत्र, तेलाङ्गाना, आन्ध्र प्रदेश, पश्चिम-मध्य र उत्तर बङ्गालको खाडीका केही भागहरू हुँदै त्रिपुरा, मणिपुर, नागाल्याण्ड, अरुणाचल प्रदेश, असम र मेघालयसम्म फैलिइसकेको छ। साथै, बङ्गालको खाडी, उत्तरपूर्वी भारत, पश्चिम बङ्गाल र सिक्किमतर्फ पनि मनसुनको क्रमिक विस्तार भइरहेको छ। आज दिउँसो लुम्बिनीसहित देशका पहाडी भूभागहरूमा आंशिकदेखि सामान्य बदलीको सम्भावना छ।

केही स्थानहरूमा चट्याङसहित हल्कादेखि मध्यम वर्षा हुनसक्ने अनुमान गरिएको छ। उच्च पहाडी तथा हिमाली क्षेत्रमा भने हल्का वर्षासँगै हिमपातको सम्भावना पनि देखिएको छ। बागमती, गण्डकी र अन्य पहाडी प्रदेशका केही स्थानहरूमा राति चट्याङसहित हल्कादेखि मध्यम वर्षाको सम्भावना छ। उच्च हिमाली क्षेत्रहरूमा पनि हिमपातको सम्भावना कायमै रहेको छ।

महाशाखाले यस्तो मौसमले दैनिक जनजीवन, कृषि, स्वास्थ्य, सडक तथा हवाई यातायातमा असर पार्न सक्ने भन्दै आवश्यक सतर्कता अपनाउन अनुरोध गरेको छ। विशेषगरी यात्रा र बाहिरी क्रियाकलाप गर्दा मौसमको पूर्वानुमान हेरेर मात्रै योजना बनाउन सुझाव दिइएको छ।