सातदोबाटो–हात्तीवनमा कार ठोकिँदा पोल ढल्यो, सडक बन्द

ललितपुर । ललितपुरको सातदोबाटो–हात्तीवन ओरालोमा गए राति भएको कार दुर्घटनाले ठूलो क्षति निम्त्याएको छ।

तीव्र गतिमा रहेको बा १५ च ७६५२ नम्बरको कार अनियन्त्रित भई बिजुलीको पोलमा ठोक्किँदा पोल भाँचिएर सडकमा ढलेको छ, जसका कारण सडक पूर्ण रूपमा बन्द भएको छ। दुर्घटनामा कारमा सवार तीन जना घाइते भएका छन् र उनीहरूलाई उपचारका लागि बीएण्डबी अस्पताल लगिएको प्रहरीले जानकारी दिएको छ।

करिब ११ हजार भोल्टको विद्युत् प्रवाह हुने पोल सडकमा ढल्दा सुरक्षाका दृष्टिकोणले यातायात सम्पूर्ण रूपमा रोकिएको छ। घटनास्थलमा ललितपुर महानगरपालिका, नगर प्रहरी र नेपाल विद्युत् प्राधिकरणका प्राविधिकहरू खटिएका छन् र पोल हटाउने काम तीव्र गतिमा भइरहेको छ।

प्रारम्भिक अनुसन्धानअनुसार कार आफैं अनियन्त्रित भएर पोलमा ठोक्किएको हुन सक्ने प्रहरीले जनाएको छ। यातायात सहज बनाउनका लागि पोल हटाउने प्रयास जारी रहेको छ भने सर्वसाधारणलाई वैकल्पिक मार्ग प्रयोग गर्न अनुरोध गरिएको छ।