राजसंस्थाको पक्षमा राप्रपाको शक्ति प्रदर्शन: काठमाडौंको सडकमा तनाव

काठमाडौं । राष्ट्रिय प्रजातन्त्र पार्टी (राप्रपा) आजदेखि राजसंस्था पुनःस्थापनाको माग गर्दै सशक्त आन्दोलनमा उत्रिएको छ। आन्दोलनको पहिलो दिनमै राप्रपाले काठमाडौंको नयाँ बानेश्वरस्थित निषेधित क्षेत्र तोड्दै विरोध प्रदर्शन गरेको छ।

पूर्वघोषित कार्यक्रमअनुसार अध्यक्ष राजेन्द्र लिङ्देनको नेतृत्वमा नेता तथा कार्यकर्ताहरू बानेश्वर पुगेका हुन्। उनीहरूले नाराबाजी गर्दै निषेधित क्षेत्र भित्र प्रवेश गर्ने प्रयास गरेपछि सो क्षेत्रमा सुरक्षाकर्मीको बाक्लो उपस्थिति देखिएको छ।

बिहानैदेखि सडकको बीचमा प्रहरीले ब्यारिकेड राखेर सवारी आवागमन नियन्त्रणमा लिएको छ। यद्यपि, लिङ्देनले प्रदर्शन शान्तिपूर्ण हुने दाबी गरेका छन्।

राजसंस्था पुनःस्थापनाका पक्षमा राप्रपाले चरणबद्ध आन्दोलन गर्ने घोषणा गरिसकेको छ। आजको प्रदर्शन त्यसको सुरुआती संकेत भएको पार्टीले जनाएको छ।