रवि लामिछाने कारागार चलान, भैरहवा कारागारको ४ नम्बर ब्लकमा राखियो

बुटवल । राष्ट्रिय स्वतन्त्र पार्टीका सभापति रवि लामिछाने सोमबार भैरहवा कारागार चलान भएका छन्।

अदालतको आदेशमा पक्राउ परेका लामिछानेले कारागार लाग्दै गर्दा संक्षिप्त प्रतिक्रिया दिँदै भने, “केही छैन, अदालतप्रति सम्मान छ।” उच्च अदालत तुलसीपुर बुटवल इजलासको आदेशपछि शुक्रबार काठमाडौँबाट पक्राउ गरिएका लामिछानेलाई आज जिल्ला अदालतमा उपस्थित गराइ पुर्पक्षका लागि भैरहवा कारागार पठाइएको हो।

कारागार प्रशासनले उनलाई ४ नम्बर ब्लकमा राखेको छ, जुन पुरुष थुनुवाका लागि छुट्याइएको क्षेत्र हो। भैरहवा कारागारमा कुल ४ ब्लक छन्— जसमा १ र २ नम्बर ब्लक अन्य पुरुष कैदीका लागि, ३ नम्बर ब्लक महिला कैदी तथा थुनुवाका लागि र ४ नम्बर ब्लक विशेष निगरानीमा राखिनेहरूका लागि प्रयोग हुने गर्दछ।

उक्त कारागारमा यसअघि सोही सहकारी प्रकरणमा मुछिएका पूर्व डीआईजी छविलाल जोशी पनि थुनामा छन्। यो बयानमार्फत उनले अदालती प्रक्रियालाई स्वीकार गर्दै आफू कानुनी मार्गमा सहकार्य गर्न तयार रहेको संकेत गरेका छन्।