काठमाडौँ । काठमाडौँको तीनकुनेमा राजसंस्था पुनःस्थापनाको मागसहित आयोजित प्रदर्शन हिंसात्मक बनेपछि सुरक्षा निकायले घटनाको समीक्षा गर्दैछ।
सुरक्षा अधिकारीहरूको विश्लेषणअनुसार प्रदर्शन संयोजक दुर्गा प्रसाईंले सुरक्षाकर्मीलाई लक्षित गर्दै गाडी चलाएपछि स्थिति झन् तनावग्रस्त बनेको थियो। ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ का संयोजक समेत रहेका मेडिकल व्यवसायी प्रसाईं हाल फरार छन्।
उनी प्रदर्शनस्थलबाट स्कोर्पियो गाडीमा भागेको देखिए पनि शनिबार साँझसम्म उनको अत्तोपत्तो लागेको छैन। प्रहरीले उनको राहदानीलाई कालोसूची (ब्ल्याकलिस्ट) मा राख्ने प्रक्रिया अघि बढाएको छ। अध्यागमन विभागमा ब्ल्याकलिस्ट भएपछि अन्तर्राष्ट्रिय सिमानामा उनले आउजाउ गर्न नसक्ने र पक्राउ गर्न सहज हुने प्रहरी अधिकारीहरू बताउँछन्।
प्रहरी प्रधान कार्यालयका एक उच्च अधिकृतका अनुसार, आइतबारसम्म प्रसाईंको पासपोर्ट कालोसूचीमा राख्न अध्यागमन विभागलाई पत्राचार गरिनेछ। चैत १५ गतेको प्रदर्शनमा दुर्गा प्रसाईं र नवराज सुवेदीको नेतृत्व रहेको थियो, जसका क्रममा हिंसा भड्किँदा दुई जनाको ज्यान गएको छ। मृत्यु हुनेहरूमा कीर्तिपुर नगरपालिका–४ का सविन महर्जन र पत्रकार सुरेश रजक रहेका छन्।
प्रदर्शनका मुख्य नेतृत्वकर्तामध्ये नवराज सुवेदीसहित १० जना हाल प्रहरी नियन्त्रणमा छन्। उनीहरूलाई फौजदारी मुद्दाअन्तर्गत अनुसन्धान भइरहेको छ।
प्रतिक्रिया